Janë liruar për mungesë provash 4 nga të arrestuarit si të dyshuar për sulmin terrorist më 24 shtator në Banjskë të komunës së Zveçanit ku mbeti i vrarë një zyrtar i Policisë së Kosovës dhe tre sulmues. Ndërkohë, Policia e Kosovës ka arrestuar edhe katër persona tjerë.
Për tre prej tyre është marrë vendim për paraburgim prej një muajsh. Të dyshuarit me inicialet. B.S., D.M, dhe V.T, akuzohen për veprat penale, kryerja e veprave terroriste dhe vepra të rënda kundër rendit kushtetutes dhe sigurisë së Kosovës. Ministri i Punëve të Brendshme të Kosovës, Xhelal Sveçla ka akuzuar Millan Radoiçiqin, nënkryetarin e Listës Serbe – partisë më të madhe të serbëve në Kosovë – se ka organizuar dhe ka marrë pjesë në sulmin në Banjskë. Sveçla e mbështeti këtë akuzë në një video të xhiruar me dron ku sipas tij duket Radoiçiqi bashkë me disa persoa të tjerë të veshur me vjeshje ushtarake dhe të armatosur në ambientet e Manastirit. Kjo gjë sipas tij u provua edhe nga vendimi i Beogradit për të shpallur ditë zie për 3 personat e përfshirë në sulm që mbetën të vrarë. Lista Serbe – partia që ka mbështetjen e Beogradit – e as institucionet në Serbi nuk kanë reaguar lidhur me akuzat e Kosovës për përfshirjen e pretenduar të Radoiçiçit. Kosova e ka bërë përgjegjëse Serbinë për sulmin, ndërsa Beogradi zyrtar serbët e Kosovës. Sulmet ndaj Policisë së Kosovës janë dënuar nga Shtetet e Bashkuara dhe Bashkimi Evropian dhe është bërë thirrje për përballjen e fajtorëve me drejtësi.
