Kreu i Komunitetit Mysliman të Shqipërisë, Bujar Spahiuka reaguar pas plagosjes me thikë që ndodhi në xhaminë “Dine Hoxha” te rruga e Kavajës. Spahiu ka kërkuar që organet përkatëse të bëjnë të mundur zbardhjen e ngjarjes e cila lëndoi besimtarët në këto ditë Ramazani, ndërsa ka informuar se personat e lënduar janë jashtë rrezikut për jetën.
“U informova nga Myftiu i Tiranës, z. Lauren Luli, dhe nëpërmjet medias, për ngjarjen e fundit në Xhaminë Dine Hoxha. Sipas imamit Kalaja dhe besimtarëve dëshmitarë të pranishëm, një përson i jashtëm ka hyrë nga rruga në xhami duke plagosur me mjet prerës besimtarët dhe personelin e pranishëm në xhami. Fatmirësisht besimtarët e lënduar janë jashtë rrezikut për jetën. I lutemi Zotit për shërimin e tyre sa më të shpejtë. Përsoni është në duart e forcave të rendit. Kërkojmë nga organet përkatëse zbardhjen sa më parë të kësaj ngjarje e cila lëndoi besimtarët në këto ditë ramazani”, ka thënë kreu i KMSH.
Ngjarja e rëndë ndodhi ditën e sotme në Tiranë, teksa u plagosën 5 persona nga Rudolf Nikolli, i cili rezulton me precedent penal pasi 1 muaj më parë ka plagosur me thikë në këmbë 32-vjeçarin Robert Kurti. Ndërkohë, Nikolli ishte shpallur në kërkim që atëherë.
