Sulmet me raketë të Iranit në territorin izraelit kanë shkaktuar pesë viktima dhe 92 të plagosur, sipas të dhënave të fundit të publikuara nga shërbimi izraelit i emergjencës Magen David Adom.
Mes viktimave ndodhen dy gra dhe dy burra të moshuar, si dhe një tjetër person ende i paidentifikuar.
MDA konfirmon se raketat kanë goditur katër lokacione në Izraelin qendror, duke përfshirë qytetet Petah Tikva dhe Bnei Brak.
Mes të plagosurve, një grua 30-vjeçare ndodhet në gjendje të rëndë për shkak të dëmtimeve në fytyrë, ndërsa gjashtë të tjerë janë në gjendje të moderuar dhe 85 me dëmtime të lehta.
Ekipet e kërkim-shpëtimit vijojnë operacionet në dy nga zonat e goditura, ku ende raportohet për persona të bllokuar nën rrënoja, përfshirë edhe qytetin e Haifës.
Ndërkohë, Irani ka konfirmuar përmes Gardës Revolucionare se është përgjegjës për një tjetër breshëri sulmesh ndaj Izraelit. Sipas tyre, raketat kanë goditur objektiva të rëndësishëm si pjesë e një fushate hakmarrjeje që, sipas deklaratave zyrtare, do të intensifikohet.
Kryeministri izraelit Benjamin Netanyahu ka përsëritur se synimi i vendit të tij nuk është ulja e tensioneve, por ndalimi i përpjekjeve të Iranit për të zhvilluar armë bërthamore. Nga ana tjetër, Ministria iraniane e Shëndetësisë ka bërë të ditur se numri i viktimave në territorin iranian ka shkuar në 224 persona që nga e premtja.
Ministri i Mbrojtjes së Izraelit, Israel Katz, ka bërë një deklaratë të ashpër ndaj Teheranit, duke e cilësuar liderin suprem iranian si një “vrasës frikacak” që ka urdhëruar goditje të drejtpërdrejta ndaj civilëve. Katz paralajmëroi se “banorët e Teheranit do ta paguajnë çmimin” dhe konfirmoi se operacionet izraelite do të vazhdojnë pa ndërprerje.
