Covid-19 mund të shkaktojë humbje të papritur dhe të përhershme të dëgjimit, sipas shkencëtarëve në Britani, të cilët studiuan rastin e një pacienti 45-vjeçar.
Shkencëtarët arritën në konkluzionin se koronavirusi përveç humbjes së nuhatjes dhe shijes mund të shkaktojë , dëmtimin e dëgjimit.
Grupi i studiuesve i udhëhequr nga Dr Fotini-Stefania Kumba e Universitetit të Londrës dhe Spitalit Mbretëror Kombëtar, i cili publikoi studimin në revistën mjekësore «BMJ Case Reports»,vuri në dukje se problemet e dëgjimit te pacientët me covid-19 kanë nevojë për diagnostikim të menjëhershëm dhe trajtim urgjent.
Pacienti 45-vjeçar, i cili vuante nga astma dhe u sëmur me Covid-19, u intubua në spital dhe u trajtua me Remdesivir dhe medikamente të tjera. Një javë pasi u largua nga Njësia e Kujdesit Intensiv, ai filloi të humbasë dëgjimin në veshin e tij të majtë. Mjekët pohuan se asnjë nga medikamentet që morri pacienti nuk mund të shkaktonin një efekt të tillë anësor. Ndërkohë sipas rezultateve të analizave burri nuk kishte kurrë më parë probleme me dëgjimin.
Dr. Kumba vuri në dukje se deri më tani nuk është bërë e qartë se si koronavirusi mund të dëmtojë dëgjimin. Siç tha shkencëtarja, “është e mundur që SARS-CoV-2 të hyjë në qelizat e veshit dhe t’i shkatërrojë ato ose të detyrojë trupin të emetojë kimikate inflamatore, të cilat mund të jenë toksike për veshin. “Edhe humbja e pjesshme e dëgjimit ka pasoja serioze në cilësinë e jetës së një personi nëse nuk trajtohet menjëherë,” theksoi Kumba.
Profesori i Universitetit të Mançesterit, Kevin Manro pohoi se shumë njerëz që janë infektuar me Covid-19 po ankohen për zhurma në vesh ose humbje të dëgjimit. Sipas një studimi të tij, 16 në 121 pacientë që ishin infektuar me covid -19 kishin probleme dëgjimi dy muaj pas daljes nga spitali.
\Gazetareforma.al\
