Vaksinat Pfizer-BioNTech dhe Oxford-AstraZeneca janë shumë efektive kundër variantit të koronavirusit që u identifikua për herë të parë në Indi, sipas një studimi nga Public Health England (PHE).
Vaksina Pfizer ishte 88 për qind efektive dhe AstraZeneca ishte 60 për qind efektive kundër llojit B1617.2 pas dozës së dytë. Të dy vaksinat ishin më efektive kundër të ashtuquajturit lloji “Kent” – B.1.1.7, varianti dominues COVID-19 në Britani – me Pfizer që ishte 93 për qind efektive ndërsa AstraZeneca ishte 66 për qind efektiv mbi të njëjtën periudhë. Sidoqoftë, ato ishin efektive vetëm 33 për qind tre javë pas dozës së parë.
Sekretari i Shëndetësisë në Britani, Matt Hancock e përshkroi rezultatin si “novator”, ndërsa PHE tha se pret të shohë nivele edhe më të larta të efektivitetit ndaj shtrimit në spital dhe vdekjes.
“Kjo provë e re është novatore dhe vërteton se sa i vlefshëm është programi ynë i vaksinimit COVID-19 në mbrojtjen e njerëzve që duam”, tha Hancock.
Në fillim të këtij muaji, Organizata Botërore e Shëndetësisë (OBSH) e quajti llojin B1617.2 një variant shqëtësues për gjithë botën.
Studimi, i cili u zhvillua midis 5 prillit dhe 16 majit, zbuloi se të dy vaksinat ishin 33 për qind efektive kundër sëmundjes simptomatike nga lloji B1617.2 tre javë pas dozës së parë, krahasuar me rreth 50 përqind kundër llojit B.1.1. 7.
