Izolimi i familjeve shqiptare gjatë pandemisë Covid 19 bëri që fëmijët të privohen nga daljet në natyrë apo kënde lojërash. Pikërisht kjo situatë ka ndikuar në uljen e ritmit të aktivitetit fizik, ndërkohë që ka rritur orët pasive apo të gjumit tek fëmijët, thuhet në një raport të fundit të publikuar nga Organizata Botërore e Shëndetësisë.
Në studimin e realizuar tek fëmijët në Europë, u pa se 15% e fëmijëve shtuan orët e gjumit përgjatë ditëve të javës, ndërsa në fundjavë kjo shifër arrin në 17%. Thuajse të njëjtin trend ndoqën edhe fëmijët në Shqipëri.
Të dhënat e mbledhura nga ekspertët e Institutit publik, bëjnë me dije se 10,1% e fëmijëve shtuan orët e gjumit gjatë ditëve të javës, në mungesë të aktiviteti fizik, e ndërsa në fundjavë, edhe në vendin tonë shifra rritet, duke bërë që 14,5% e fëmijëve të shtojën orët që kaluan në gjumë.
Ndërkohë 9% e fëmijëve kishin reduktuar orët e gjumit gjatë ditëve të javës dhe 6.5% flinin më pak në fundjavë. Ekspertët botërorë të shëndetit thonë se vetëm 75% e fëmijëve vazhduan rutinën e gjumit pa u prekur nga pandemia. Fëmijët në San Marino u pa se kishin rritjen më të madhe të orëve të gjumit në periudhën e pandemisë.
