Seanca gjyqësore e radhës për çështjen e sterilizimit u ndërpre sot, pasi avokati i të pandehurit Klodian Rjepaj nuk ishte i pranishëm për arsye familjare. Gjykata vendosi shtyrjen e procesit për më 28 maj.
Para ndërprerjes së seancës, Rjepaj mbajti një qëndrim kritik ndaj mënyrës se si është trajtuar çështja përgjatë viteve.
Ai deklaroi se hetimi dhe diskutimi publik për këtë procedurë janë deformuar që prej fillimit, duke e cilësuar të paragjykuar dhe të ndikuar nga retorika politike e mediatike.
“S’ka pasur kurrë një debat profesional mbi këtë çështje. Gjatë gjithë kohës është trajtuar në mënyrë folklorike dhe nuk i është lënë hapësirë diskutimit teknik apo shkencor,” tha Rjepaj para trupit gjykues.
Ai shtoi se vendimet paraprake të gjykatave tregojnë qasje të njëanshme dhe të ndikuar nga opinioni publik, ndërsa pretendoi se vetë projekti i sterilizimit është keqinterpretuar.
“Nuk ekziston një projekt i vetëm me elementët që përmenden në aktakuzë. Këto janë konstrukte që nuk përputhen me realitetin e asaj që është zbatuar në terren,” u shpreh ai.
Çfarë tha Klodian Rjepaj në gjykatë:
Ne jemi këtu për një procedurë, që ka gati 19 vite që diskutohet, paragjykohet, akuzohet dhe në asnjë rast kjo çështje nuk është lejuar të debatohet shkencërisht, por është debatuar në mënyrë folklorike, mediatike dhe politike. Paragjykini për këtë çështje është shumë i madh. Deri më sot cdo vendim gjykate ka treguar paragjykim ndaj kësaj cështjeje.
Nga ana mediatike, sterilizimi është bërë si thesi bosh i miellit, që sa herë e shkund nxjerr tym. Në respëkt të kirurgëve dhe stafeve mjekësore, që janë ndihmuar nga ky shërbim duhet bërë një debat mirëfilli. Kisha shkruar me shkrin dore sot, por më ra një shishe ujë mbi letra dhe u shpërnda boja.
Projekti i Sterilizimit është një devijim nga projekti i vërtetë. Është devijim i qëllimshëm për të bërë persekutim. Nuk ekziston projekti i Sterilizimit. Të gjithë elementët në kallëzim nuk përputhen me elementët e projektit.
Nuk është gjykuar deri sot që akt-padia e bërë nga Nisma Thurje është e rreme, mbi fakte të pavërteta.
