Ministrja e Shtetit për Marrëdhëniet me Parlamentin, Elisa Spiropali, foli në Kuvend lidhur me rastin e dhunës ndaj avokatit Sokol Mëngjesi në zonën e Ish-Bllokut. Mëngjesi u dhunua rëndë nga disa persona dhe përfundoi në spital i intubuar, pasojë e frakturave dhe edemave në kokë.
Spiropali kritikoi opozitën dhe ish-kryeministrin Sali Berisha për akuzat ndaj kryeministrit Edi Rama për këtë ngjarje. “Jeni po ju që akuzoni me të parën kundërshtarin politik Edi Ramën për çdo gjë që ndodh në faqen e dheut. Siç ishte rasti dje me zotin Mëngjesi që i identifikoi policia. Para se të prisnit hetimin e policisë, ju shpallët fajtorin, Edi Ramën,” tha Spiropali. Ajo gjithashtu shprehu urimet për shërim të shpejtë për avokatin Mëngjesi.
Avokati Sokol Mëngjesi u dhunua për shkak të detyrës së tij. Ai përfaqësoi një palë që fitoi një çështje pronësie në gjykatë, por një nga përfituesit, Dritan Nano, nuk pranoi të zbatojë kontratën dhe dyshohet se porositi dhunën ndaj avokatit. “Takimi i para një muaji ka qenë i fundit para dhunës, por nuk ranë dakord, pasi Sokol Mëngjesi insistoi që kontrata duhet të respektohet,” thuhet në raportimet.
Sulmi u krye nga tre persona, ndërsa një i katërt i priti me makinë. Policia ka arrestuar organizatorin e sulmit, Dritan Nano, dhe një tjetër person, Dorian Alia, është vetëdorëzuar. Tre të tjerët, Elton Kasaj, Romario Tabaku dhe Drivald Alia, janë ende në kërkim. “Policia e Shtetit ka ofruar 20 mijë euro për këdo që jep informacion që çon në arrestimin e autorëve,” deklaroi policia.
