Në një seancë të tensionuar në Kuvendin e Shqipërisë, Ministrja e Shtetit për Marrëdhëniet me Parlamentin, Elisa Spiropali, ka adresuar fjalë të ashpra ndaj Gazment Bardhit, deputetit të Partisë Demokratike, në lidhje me qëndrimin e tij për projekt-rezolutën kundër korrupsionit. Spiropali e sfidoi Bardhin duke i thënë: “Sa herë të shoh, dëgjoj, pyes veten kush je, ai që e lufton me fjalë korrupsionin apo ai që shkon poshtë ballkonit të liderit tënd të vjetër? Je ai që lufton korrupsionin, Gazi, me fjalë goje apo ai që merr porosi për të folur këtu me fjalët e Rrugës së Shpresës.”
Spiropali vazhdoi të sfidojë Bardhin, duke i thënë: “Të ndryshosh mendje nuk është mëkat, por të kesh dy mendje është hall i madh. Sot deklaroni abstenim. Kundër saj apo të dyzuar ishit edhe para se ta lexonit. Po ju ftoj të bëni të kundërtën.”
Nga ana tjetër, Gazment Bardhi iu përgjigj ashpër Spiropalit, duke iu referuar fjalëve të saj si një taktikë për të shmangur përgjegjësinë për luftën kundër korrupsionit. Ai tha: “Se luftojmë korrupsionin me pushkë uji apo me fjalë. Unë jam Gazment Bardhi zonja ministre, djali i Durimit dhe i Vjollcës.” Bardhi më tej ironizoi duke thënë: “Do të doje që të ishte vajza e babait të Surrelit, por janë ca të tjera para teje. E di që nuk je, por mos je motra e Olsit, e Arben Ndokës, e Bajrave, apo kunata e Pëllumb Gjokës, apo vajza e Mirel Mërtirit dhe e Zotos. Gjeje se kush je se unë e di përgjigjen time.” Ai theksoi se “korrupsioni nuk luftohet me pushkë uji”.
