Prokuroria e Posaçme Kundër Korrupsionit dhe Krimit të Organizuar ka marrë zyrtarisht të pandehur kryebashkiakun e Tiranës, Erion Veliaj, për një sërë akuzash që lidhen me korrupsion, pastrim parash dhe fshehje pasurie. Njoftimi për akuzat do t’i komunikohet Veliajt më 23 korrik.
Veliaj u arrestua më 10 shkurt në zyrën e Bashkisë së Tiranës dhe po hetohet për 13 akuza të ndërlidhura me 4 vepra penale, përfshirë “Korrupsionin pasiv të funksionarëve të lartë shtetërorë”, “Pastrimin e produkteve të veprës penale”, “Fshehjen e pasurisë” dhe “Futjen e sendeve të palejuara në qeli”.
Në hetim është përfshirë edhe bashkëshortja e tij, Ajola Xoxa, e cila ndodhet nën masën e sigurisë “detyrim paraqitje”.
Sipas SPAK, nga provat e grumbulluara rezulton se Veliaj dhe bashkëshortja e tij kanë krijuar një mekanizëm përfitimi të paligjshëm të fondeve publike të Bashkisë Tiranë, duke përdorur forma të kamufluara dhe kundërligjshme për pasurimin personal.
Aktualisht, Veliaj ndodhet në paraburgim në Durrës, dhe ende nuk dihet nëse kryebashkiaku do të lirohet për pak orë nga qelia për t’u përballur me prokurorët e posaçëm, Altin Dumani dhe Ols Dado.
Gjithashtu, mbetet ende e paqartë nëse SPAK do të dërgojë dosjen për gjykim apo do të kërkojë shtyrje të hetimeve.
Përveç Veliajt dhe bashkëshortes së tij, në hetim janë përfshirë edhe gjashtë biznesmenë të tjerë.
