Prokuroria e Posaçme kundër Korrupsionit dhe Krimit të Organizuar ka përfunduar hetimet për një fragment të dosjes së njohur si “5D”, duke zbuluar prova të forta lidhur me veprat penale të kryera nga individë të ndryshëm.
Sipas hetimeve, është provuar se shoqëria “5D Konstruksion” sh.p.k (e njohur edhe si “V.A.S Konstruksion”) ka përfituar kontrata publike në mënyrë të paligjshme nga autoritetet kontraktore “Tirana Parking” dhe “Klubi Sportiv Tirana”.
Hetimet kanë zbuluar se Deborah Keçi, në cilësinë e titullarit të autoritetit kontraktor të “Klubit Sportiv Tirana”, ka bashkëpunuar me anëtarët e Komisionit të Vlerësimit të Ofertave, Teuta Guri, Jetjon Mera dhe Rejnaldo Gjerazi, për t’i krijuar avantazhe të padrejta operatorit “5D Konstruksion”.
Pavarësisht procedurave të prokurimit, ato kanë siguruar që ky operator të shpallej fitues që në fazën e përgatitjes së dokumenteve, ende pa shpalljen zyrtare të procedurës.
Po ashtu, gjatë hetimeve është zbuluar se Eglantina Zere, në cilësinë e titullarit të “Tirana Parking”, ka bashkëpunuar me Enkelejda Qyta, Bruno Koçi, Rivjola Baxha dhe Kristo Zhulati për të favorizuar bashkimin e operatorëve ekonomikë “V.A.S Konstruksion” dhe “Rroku Guest” në një procedurë tjetër prokurimi për “Rikonstruksionin e sheshit të parkimit te Selman Stermasi”.
Anëtarët e Komisionit të Vlerësimit të Ofertave nuk kanë vlerësuar ofertat në përputhje me ligjin, por kanë vepruar për të favorizuar këtë bashkim, duke i krijuar avantazhe dhe privilegje të padrejta.
Në përfundim të hetimeve, Prokuroria e Posaçme ka depozituar kërkesën për dërgimin në gjyq të të pandehurve për veprën penale të “Shkeljes së barazisë së pjesëmarrësve në tendera dhe ankande publike”.
Të pandehurit janë akuzuar për këtë vepër penale e cila është parashikuar në nenet 258 dhe 25 të Kodit Penal (për para ndryshimeve të Ligjit nr.43/2021, datë 23.03.2021).
Kërkesat për dërgimin në gjyq janë paraqitur për dy çështje penale të ndara, nr.75/2 dhe nr.75/3, për të pandehurit e mësipërm, të cilët janë të përfshirë në manipulimin e procedurave të prokurimit dhe shpërndarjen e kontratave publike në mënyrë të jashtëligjshme.
