Pas përplasjes fizike të ndodhur më 24 prill në fshatin Ostren të Bulqizës, gjatë një aktiviteti elektoral të Partisë Demokratike, Policia ka referuar materialet në Prokurorinë e Posaçme, duke hetuar ngjarjen si “kanosje apo dhunim ndaj pjesëmarrësve në zgjedhje”.
Në qendër të hetimeve është përfshirë deputeti demokrat Xhelal Mziu, i cili akuzohet nga Kalosh Murra se, së bashku me nipin e tij, ka ushtruar dhunë fizike ndaj tij.
Por edhe vetë Mziu ka depozituar një kallëzim penal në SPAK, duke pretenduar se ka qenë ai që është dhunuar gjatë incidentit. Një tjetër qytetar që pretendon se është goditur gjithashtu ka bërë kallëzim për ngjarjen.
Dosja i është caktuar prokurorit Elvin Gokaj, i cili mbulon çështjet zgjedhore në qarkun Dibër. Në vijim pritet që të thirren për dëshmi personat e përfshirë, si dhe të shqyrtohen pamjet filmike nga vendi i ngjarjes, për të cilat Mziu ka kërkuar zyrtarisht sekuestrimin.
Deputeti demokrat ka akuzuar Policinë e Dibrës përanshmëri, duke pretenduar se drejtori i policisë ka lidhje familjare me kandidatin socialist në këtë zonë, Jeton Dani.
Ai ka kërkuar një hetim të thelluar nga SPAK për atë që e cilëson një ngjarje të rëndë politike me sfond intimidues.
