Prokuroria e Posaçme kundër Korrupsionit dhe Krimit të Organizuar ka ndërmarrë një aksion të gjerë duke vendosur nën sekuestro pasuritë e Ergys Agasit, Ermal Beqirit, si dhe të ish-drejtoreshës së AKSHI-t, Mirlinda Karçanaj.
Sipas të dhënave, në total janë sekuestruar 29 pasuri që i përkasin Ergys Agasit, përfshirë apartamente, vila dhe sipërfaqe toke në zona të njohura të Tiranës dhe Durrësit. Po ashtu janë bllokuar shtatë llogari bankare dhe kompania “EA Solution”.
Ndërkohë, për Ermal Beqirin janë vënë nën sekuestro 10 pasuri të paluajtshme, ku përfshihet edhe një jaht luksoz, automjete, si dhe llogaritë e kompanisë “Soft&Solution” dhe ato personale.
Gjatë këtij operacioni janë sekuestruar gjithashtu edhe pasuritë e Mirlinda Karçanajt dhe Gëzim Hoxhës.
Nga verifikimet rezulton se në llogaritë bankare të katër personave janë gjetur rreth 5 milionë euro, ndërsa mes pasurive të bllokuara përfshihen edhe tre vila.
Hetimet vijojnë për dokumentimin e plotë të burimit të këtyre pasurive dhe lidhjeve të mundshme me veprimtari të paligjshme.
