Deputetët e Kuvendit të Kosovës do të mblidhen sot në përpjekjen e 40-të me radhë për konstituimin e legjislaturës së re, një proces që vijon të mbetet i bllokuar pavarësisht vendimit të Gjykatës Kushtetuese.
Ky institucion ka përcaktuar se seanca konstituive duhet të përfundojë brenda 30 ditësh nga vendimi, por partitë parlamentare ende nuk kanë arritur konsensus.
Kushtetuesja vendosi të enjten se legjislatura e nëntë duhet të konstituohet më së voni brenda afatit njëmujor, por interpretimet mbi këtë aktgjykim kanë prodhuar përplasje të reja mes partive politike.
Takimi i fundit ndërpartiak, i zhvilluar të shtunën nën thirrjen e kryetarit të VV-së, Albin Kurti, përfundoi pa rezultat.
Përfaqësuesit e PDK-së, LDK-së dhe AAK-së e quajtën takimin një farsë dhe kritikuan Vetëvendosjen për mungesë vullneti të sinqertë për kompromis.
Nga ana tjetër, Kurti theksoi se partia e tij, si fituese e zgjedhjeve të 9 shkurtit, kishte paraqitur dy propozime kompromisi: votim të fshehtë dhe votim në pako për kryetarin dhe nënkryetarët e Kuvendit.
Ai shtoi se ndonëse VV-ja ka përgjegjësi për formimin e qeverisë, konstituimi i Kuvendit është përgjegjësi kolektive e të gjitha forcave politike, siç përcakton aktgjykimi i Kushtetueses.
Kurti akuzoi PDK-në dhe LDK-në për interpretim të gabuar të vendimit të Gjykatës Kushtetuese, duke shtuar se qëndrimet e tyre po zvarrisin një proces të domosdoshëm për funksionimin institucional të vendit.
