Sot deputetët do të ulen për herë të 25-të në Kuvend, duke tentuar përsëri të konstituojnë legjislaturën e nëntë, e cila duhet të dalë nga zgjedhjet e 9 shkurtit.
Seanca konstituive, që nisi më 15 prill, deri tani ka dështuar në të gjitha përpjekjet për formimin e shumicës.
Sot vazhdimi i seancës është caktuar të nisë në orën 10:30. Seancat e mëparshme kanë qenë të shkurtra, për shkak të mungesës së votës për komisionin që do të mbikëqyrë votimin e fshehtë për zgjedhjen e Albulena Haxhiut si kryetare e Kuvendit. Kjo pozitë po kërkohet nga Lëvizja Vetëvendosje, Guxo dhe Alternativa, por partitë e tjera parlamentare refuzojnë të japin votën.
Partitë që nuk mbështesin Haxhiun insistojnë që të ndryshohet kandidati për kryetar Kuvendi dhe kanë bërë të ditur se nuk do ta votojnë atë.
Grupi parlamentar i Aleancës për Ardhmërinë e Kosovës ka dërguar në Gjykatën Kushtetuese një kërkesë për interpretimin e mënyrës së votimit të fshehtë për kryetarin e Kuvendit.
Në përpjekje për të zgjidhur ngërçin, më 15 maj presidentja Vjosa Osmani zhvilloi një takim me përfaqësuesit e partive, por as aty nuk arriti të sigurojë konsensus për konstituimin e Kuvendit.
