Kuvendi i Kosovës pritet të mblidhet sërish këtë të martë në një tjetër përpjekje për konstituimin e legjislaturës së nëntë, pas zgjedhjeve të mbajtura më 9 shkurt.
Seanca është planifikuar të nisë në orën 11:00 dhe vjen pas 21 dështimeve të mëparshme për formimin e organeve drejtuese të Parlamentit.
Pengesat kryesore lidhen me mungesën e konsensusit për zgjedhjen e kryetarit të Kuvendit. Në seancën e fundit, më 25 maj, dështoi ngritja e një komisioni që do të mbikëqyrte një votim të fshehtë për këtë post.
Propozimi për këtë formë votimi, bërë më 1 maj nga kryesuesi Avni Dehari, është aktualisht nën shqyrtim nga Gjykata Kushtetuese, pas ankesave të disa partive.
Lëvizja Vetëvendosje vazhdon të mbështesë Albulena Haxhiun si kandidate për kryeparlamentare, por ajo nuk ka gjetur mbështetje nga forcat e tjera politike.
Këto të fundit kanë kërkuar një kandidaturë tjetër, që do të siguronte më shumë përfshirje dhe mirëkuptim ndërpartiak.
Pas seancës së fundit, përfaqësues të partive theksuan se nuk kanë ndryshuar qëndrim. Deputetja e Vetëvendosjes, Donika Gërvalla, akuzoi partitë e tjera për bllokimin e procesit.
Ndërkohë, nënkryetarja e PDK-së, Vlora Çitaku, fajësoi Albin Kurtin për situatën, duke e cilësuar kryeneçësinë e tij si pengesë për formimin e institucioneve dhe duke theksuar se PDK është e gatshme të ofrojë alternativa për zhbllokimin e ngërçit.
