Deputetët e Kosovës do të mblidhen sërish për herë të 45-të në përpjekje për të konstituuar përbërjen e re të Kuvendit, të dalë nga zgjedhjet e 9 shkurtit.
Procesi po zvarritet prej muajsh për shkak të mungesës së dakordësisë për zgjedhjen e kryetarit të Kuvendit.
As në seancën e 44-të nuk pati përparim: deputetët refuzuan sërish të votojnë komisionin që do të mbikëqyrte votimin e fshehtë për kreun e parlamentit.
Ky është një hap procedural i domosdoshëm për zgjedhjen e kryetarit dhe nënkryetarëve të Kuvendit, pa të cilin procesi nuk mund të ecë përpara.
Lëvizja Vetëvendosje, fituese e zgjedhjeve, ka të drejtën për të propozuar kandidatin për kryetar parlamenti dhe ka qëndruar në mbështetje të kandidaturës së Haxhiut.
Por ky emër po kundërshtohet nga Partia Demokratike e Kosovës dhe Aleanca për Ardhmërinë e Kosovës, të cilat e konsiderojnë Haxhiun si figurë përçarëse dhe i kërkojnë VV-së të ofrojë një alternativë tjetër.
Më 26 qershor, Gjykata Kushtetuese i kujtoi Kuvendit detyrimin për ta përmbyllur konstituimin brenda 30 ditësh, por pa saktësuar pasojat nëse ky afat nuk respektohet.
Në këtë situatë të bllokuar, presidentja Vjosa Osmani ka ftuar liderët politikë në konsultime dhe ka paralajmëruar se mund t’i drejtohet sërish Kushtetueses për interpretim shtesë.
Zgjedhja e kryetarit dhe pesë nënkryetarëve është kusht për konstituimin e Kuvendit, i cili nga ana tjetër është parakusht për formimin e qeverisë së re. Deri atëherë, vendi mbetet në ngërç institucional.
