Vazhdojnë sërish luhatjet e çmimit të naftës dhe gazit dhe ditën e sotme Bordi i Transparencës bën të ditur se për periudhën 29 mars- 31 mars 2022 do të ketë ndryshime.
1 litër naftë do të tregtohet për 237 lekë nga 245 lekë që ishte më parë. Për benzinën çmimi do të jetë 211 lekë për litër nga 218.
Por ai që ka pësuar rritje është gazi. Një litër gaz do të jetë 116 lekë nga 110 lekë.
Bordi i Transparencës i mbledhur në datë 29 mars 2022 vendosi çmimet e reja të shitjes së karburanteve me pakicë dhe shumicë për tregun vendas.
Nisur sa më sipër, Bordi i Transparencës i ngritur me vendim qeverie, me qëllim kufizimin e përkohshëm të çmimeve të tregtimit me shumicë/pakicë, bazuar në metodologjinë e ndërtimit të çmimeve sipas nenit 21/5 të Aktit Normativ, vendosi:
Çmimi me shumicë i nënproduktit gazoil do të jetë 225 lekë/litër dhe nënproduktit benzinë do të jetë 199 lekë/liter për periudhën 29 mars- 31 mars 2022
Çmimi i shitjes me pakicë i nënproduktit gazoil i standardit SSH EN 590 për periudhën 29 mars – 31 mars 2022, të jetë 237 lekë/litri.
Çmimi i shitjes me pakicë i nënproduktit benzinë e standardit SSH EN 228 për periudhën 29 mars- 31 mars 2022, të jetë 211 lekë/litri.
Çmimi i shitjes me pakicë i nënproduktit gaz për periudhën 29 mars- 31 mars 2022, të jetë 116 lekë/litri dhe me shumicë 104 lekë/litri.
Vendimi i Bordit hyn në fuqi dhe do reflektohet në datë 29 mars, ndërkohë që mbledhja e ardhshme do të jetë ditën e enjte, datë 31.03.2022 me qëllim pasqyrimin në çmimin e shitjes me pakicë të këtyre nënprodukteve, të ndryshimeve të mundshme të çmimeve në tregjet ndërkombëtare.
Theksojmë se në dy herët e fundit në vendimet e Bordit të Transparenëcs ka pasur rritje të çmimit të naftës, që që përputhet edhe me “pauzën” e protestive nga qytetarët. Ndërkohë që sot është paralajmëruar sërish protestë, vjen vendimi për një ulje të lehtë të çmimit të naftës, dhe nuk duket shumë rastësi!
