Pas 20 përpjekjeve të dështuara, Kuvendi i Kosovës pritet të mblidhet përsëri të dielën për të tentuar sërish konstituimin e legjislaturës së nëntë, të dalë nga zgjedhjet e 9 shkurtit. Seanca do të nisë në orën 11:00.
Herën e fundit, më 23 maj, dështoi për herë të 12-të formimi i komisionit për mbikëqyrjen e një votimi të fshehtë për zgjedhjen e kryetarit të Kuvendit.
Kjo çështje, e propozuar më 1 maj nga kryesuesi i seancës Avni Dehari, është çuar në Gjykatën Kushtetuese nga partitë opozitare të legjislaturës së kaluar.
Partia fituese, Lëvizja Vetëvendosje, vazhdon të mbështesë kandidaturën e Albulena Haxhiut për kryeparlamentare, por ajo nuk ka arritur të sigurojë mbështetje nga partitë tjera.
Këto të fundit i kanë kërkuar Vetëvendosjes që të ndryshojë kandidatin dhe të propozojë një emër më të pranueshëm për të gjithë.
Pas seancës së fundit, përfaqësues të partive politike konfirmuan qëndrimet e tyre të pandryshuara. Deputetja nga Vetëvendosje, Donika Gërvalla, akuzoi partitë opozitare për bllokadën në Kuvend, duke thënë se qytetarët nuk meritojnë që të pengohet puna dhe i bëri thirrje deputetëve që në seancën e ardhshme të votojnë për të çuar përpara procesin.
Nga ana tjetër, nënkryetarja e PDK-së, Vlora Çitaku, kritikoi Vetëvendosjen dhe kryetarin e saj Albin Kurti, duke thënë se vendi është peng i qëndrimeve të tyre të forta. Ajo shtoi se PDK-ja është e gatshme të ofrojë alternativa për të zgjidhur situatën.
