Drejtori i Autoriteti Rrugor Shqiptar, Ergys Verdho, në mungesë të ministres Belinda Balluku, e cila gjendet në Dubai, ka lëshuar pak më parë një reagim për skandalin e rrugës së Borshit. “Rruga në zonën e rrëshqitjes, në lagjen Vonja të Borshit, si edhe në zona të tjera pranë Borshit, ka filluar të shfaqë fenomenet e rrëshqitjeve, të cilat kanë qenë dhe janë ende aktive”, deklaron ARRSH pasi bën një histori, që nga koha e ndërtimit të saj në vitin 2009.
“Nga ana e institucionit tonë, për të gjitha këto rrëshqitje në vitin 2015, janë realizuar projektet për stabilizimin e tyre, por vlera për financimin e këtyre projekteve mbetet e lartë dhe ishte planifikuar implementimi i tyre në momentin e rehabilitimit të plotë të aksit rrugor”, deklaron ARRSH. Pra, nuk paskan dalë paratë e Bankës botërore të dhëna për një kontratë 5 vjeçare kompanisë “Salillari”.
“Në këto kushte, është bërë vetëm mirëmbajtja rutinë. Gjatë mirëmbajtjes, në këto zona, janë kryer disa ndërhyrje, sipas parashikimeve brenda sferës së kontratës, duke bërë vetëm sistemimin e shtresave asfaltike të rrugës, si dhe rregullimin e kunetave anësore me qëllim largimin e ujërave sipërfaqësore”, sqaron ARRSH.
Si pasojë e reshjeve të rëna gjatë këtyre ditëve dhe për shkak të rritjes së nivelit të ujërave nëntokësor, fenomeni i rrëshqitjes është aktivizuar dhe përshpejtuar duke marrë përmasa të mëdha në një gjatësi prej afro 100m.
“Nga momenti i evidentimit të fillimit të rrëshqitjes, nga ana e kontraktorit të mirëmbajtjes, janë marrë masa për sigurinë e lëvizjes së përdoruesve të rrugës dhe është mbajtur në monitorim edhe gjatë natës”, deklaron ARRSH.
“Bazuar në një studim të veçantë të hollësishëm gjeologo-inxhinierik emergjent, do të vendoset për zgjidhjen përfundimtare të rrëshqitjes, që nisur nga inspektimi vizual i dëmtimit, mund të lidhet me zbatimin ose jo të pilotave për ndërtimin e një muri të ri mbajtës prej betonarmeje gjatë gjithë gjatësisë së rrëshqitjes”, këto janë punimet që nuk janë bërë dhe do të bëhen në të ardhmen.
KLSH nis kontrollin
Kryetari i KLSH, Arben Shehu ka firmosur urdhrin urgjent për të dërguar një ekip inspektorësh pranë ARRSH, për të parë me imtësi kontratën e rrugës së Borshit,që u shemb nga shiu tre ditë më parë.
KLSH do të kontrollojë të gjithë procedurën përkatëse si dhe do të bëjë verifikimin fizik të punimeve të kryera në të.
Rruga e shembur i përket zonës D, në rajonin jugor-Vlorë-Gjirokastër, me gjatësi 350 kilometra, dhe me vlerë 13.7 milionë euro, ku u shpall fitues një konsorcium i përbërë nga kompania Elicatechnical Commerce Societa dhe kompania “Salillari” sh.p.k.
Kujtojmë që rruga u rikonstruktua 8 muaj më parë, dhe “Salillari” do ta mirëmbante.
Financimi për të gjitha rrugët në Shqipëri për mirëmbajtjen në total ka qenë 128 milion euro nga të cilat 65.9 janë dhënë nga Banka Botërore.
Rruga e restauruar nga “Salillari” pësoi dëmtime të rënda në një pjesë pranë fshatit të Borshit, duke paralizuar qarkullimin, por edhe duke vënë në rrezik jetët e shoferëve që përdorin këtë aks.
“Salillari” është kompania që e ndërtoi rrugën një vit më parë, por edhe firma që kryen mirëmbajtjen e këtij aksi. Kujtojmë se është hera e parë që KLSH nis kontrolle urgjente.
Reagimi Bankës Botërore
Duke parë se ARRSH dhe kompanitë private i hartuan pa përgjegjësi kontratat 5 vjeçare të mirëmbajtjes, reagoi në 2018, edhe Banka Botërore. Ajo është financuese e projektit “Mirëmbajtja dhe Siguria Rrugore bazuar në Rezultate”.
“Kontratat e rrugëve po kalojnë në një fazë modifikimi dhe duhet të miratohen sa më shpejt të jetë e mundur për të garantuar zbatim të suksesshëm dhe në mënyrë që përdoruesit e rrugëve shqiptare të përfitojnë”, thuhet në këtë raport të Bankës Botërore.
Por, pavarësisht paralajmërimeve të Bankës Botërore, duket se asgjë nuk ka ndryshuar. Në fundjavën që lamë pas, prurjet nga kodrat përreth fshatit Borsh, të cilat pasuan reshjet e shiut, e ndarë rrugën kryesore në mes, duke u shndërruar në një rrezik serioz për jetën dhe shëndetin e drejtuesve të automjeteve dhe të banorëve të zonës.
/Gazetareforma.com/
