Pak ditë më parë plasi skandali në rrjetin e dyqaneve “KFC” në Shqipëri ku ky rrjet kishte shitur mish pule i infektuar me salmonelë. Alarmin për mishin e pulës me salmonelë në rrjetin “KFC” e ka lëshuar portali “RASFF” i Bashkimit Evropian, i cili bën shkëmbim informacioni në kohë reale sapo konstaton risk në zinxhirin ushqimor.
Po cila ishte arsyeja që AKU nuk njoftoi qytetarët për këtë shkelje?
Njoftimi që tregonte se mishi i pulës i marinuar “KFC” është me prezencë salmonele është bërë në datën 8.7.2024. Pas këtij njoftimi u dërgua një kërkesë AKU e cila njoftoi mediat se “Janë importuar 1535.04 kg mish pule dhe është bllokuar nga inspektorët e AKU-t vetëm 177.12 kg”.
Pra, ndërsa Autoritetit Kombëtar nuk e kishte bërë detyrën e tij për të kontrolluar bizneset për cilësinë e ushqimit, e doganat nuk kishin kontrolluar çfarë lloj mishi po futet në territorin shqiptar janë shitur 1357.92 kg mish pule me prezencë salmonele.
Ky mish me prezencë salmonele sjell probleme serioze në shëndetin e njeriut, e duke marrë parasysh shtrirjen që ka rrjeti i dyqaneve “KFC” në vendin tonë si: KFC BLLOKU tek rruga “Ibrahim Rugova”, KFC PARK GATE në rrugën e Elbasanit, KFC QTU në autostradën Tiranë – Durrës km 6, KFC ASTIR në rrugën “Tre Dëshmorët”, KFC Durrës në rrugën “Taulantia” , KFC në rrugën “Çamëria” dhe KFC RINAS në Aeroportin “Nënë Tereza”.
Pra, mishi i shitur ka pasur një shtrirje të gjerë në popullatë edhe pse deri më tani çuditërisht mediat nuk kanë bërë publike ndonjë rast të ndonjë individi që ka pasur komplikacione.
Por pyetja që shtrohet është se përse vazhdon të mbetet e hapur “KFC”-ja?
Edhe pse shkeljet që ka bërë rrjeti i dyqaneve të KFC u zbulua edhe u konfirmua zyrtarisht nga Autoriteti Kombëtar i Ushqimit përsëri ky rrjet vazhdon të operojë në tregun shqiptar. A nuk duhet të ishte mbyllur ky biznes nga AKU për shkelje dhe dëmtim të konsumatorëve? Çfarë po ndodh me rrjetin e dyqaneve të “KFC”? Çfarë mase i është vendosur këtij rrjeti për shkeljet që ka bërë? Përse AKU nuk ka dalë në një deklaratë për shtyp për të treguar rrjedhën e ngjarjes?
Ndërkohë sipas QKB kjo kompani rezulton në emër të shoqërisë “GLOBAL FAST FOOD ALBANIA”, ku si administrator është vendosur zoti Revaz Saakadze për një afat 5 (pese) vjeçar që nga gushti i vitit 2019, i cili blen 100 % të aksioneve të KFC në Shqipëri.
