Më 12 mars, një tjetër alarm për produkte ushqimore nga Shqipëria u dha përmes sistemit evropian të njoftimeve të shpejta (RASFF). Kësaj radhe, Kroacia ndaloi një ngarkesë me speca shqiptarë, pasi analizat treguan nivele shumë të larta pesticidi, që paraqesin rrezik serioz për konsumatorët.
Specat kishin përmbajtje të lartë të flonicamidit, një insekticid me tretshmëri të madhe në ujë, që përdoret për të kontrolluar dëmtuesit në fusha dhe sera. Studimet tregojnë se ky pesticid mund të shkaktojë dëmtime në organet jetike si mëlçia dhe veshkat e njerëzve.
Edhe pse alarmi nga BE-ja u dha para gati një muaji, Ministria e Bujqësisë ende nuk ka bërë asnjë deklaratë zyrtare mbi fatin e kësaj ngarkese. Nuk dihet nëse specat janë asgjësuar, apo janë shpërndarë në tregun vendas, siç ndodhi më parë me mandarinat që Kroacia refuzoi për shkak të pesticideve, por që më pas u shitën në tregun shqiptar.
Ndërkohë, institucionet kanë mbetur në heshtje totale. Asnjë informacion zyrtar nuk është dhënë lidhur me këtë çështje, ndryshe nga skandali i mandarinave ku pati disa arrestime. Kjo mungesë transparence ka rritur shqetësimin e qytetarëve për sigurinë ushqimore.
Ndërsa skandalet nuk kanë fund, një tjetër incident është shënuar me luleshtrydhet e importuara nga Greqia nga kompania “Geri shpk”. Produktet u gjetën të kontaminuara me pesticidin hexythiazox, një substancë e rrezikshme për shëndetin njerëzor. AKU ndërmori me vonesë aksion për të tërhequr nga tregu ngarkesën e kontaminuar, por shumë nga produktet ishin tashmë konsumuar nga qytetarët.
Këto incidente janë pjesë e një serie rastesh të ngjashme që kanë tronditur besimin e publikut tek cilësia dhe siguria e produkteve ushqimore në vend. Më herët, skandale të ngjashme kanë përfshirë mish pule me salmonelë dhe mandarina të mbushura me pesticide.
Në një kohë kur qytetarët presin përgjigje konkrete, Ministria e Bujqësisë dhe AKU vijojnë të mos reagojnë, ndërsa shqetësimi publik për sigurinë ushqimore vazhdon të rritet.