Një rast i rëndë mashtrimi me produkte ushqimore është zbuluar nga Policia e Shtetit në Vorë, ku subjekti tregtar “Master AL” rihidhte në treg produkte të skaduara, duke falsifikuar etiketat dhe duke rrezikuar seriozisht shëndetin e qytetarëve.
Sipas njoftimit zyrtar, në pranga kanë rënë Florenc Domi, administrator i kompanisë, dhe Agim Domi, magazinier. Ndërkohë, janë proceduar penalisht ortaku i shoqërisë dhe shoferi i magazinës.
Pamjet e shpërndara nga policia tregojnë qartë mallrat e kapura në operacion, përfshirë brioshë, fruta të thata, fara, pije dhe hurma arabie, të cilat kishin afatin e skadencës në janar dhe shkurt 2025. Përmes falsifikimit të etiketave, këto produkte janë tentuar të rihedhen në treg për shitje.
Gjatë aksionit, u sekuestruan si prova materiale 716 koli dhe disa qindra kilogramë mallra ushqimorë të përpunuar. Sipas autoriteteve, kjo veprimtari e paligjshme përfshinte jo vetëm falsifikim dhe mashtrim, por edhe shkelje të shumta fiskale dhe ligjore.
Materialet procedurale janë referuar Prokurorisë së Juridiksionit të Përgjithshëm Tiranë për veprime të mëtejshme, për një sërë veprash penale që përfshijnë: “Shkelja e të drejtave të pronësisë industriale”, “Falsifikimi i vulave, stampave ose formularëve”, “Fshehja e të ardhurave”, “Mospagimi i taksave dhe tatimeve”, “Punësim i paligjshëm” dhe “Importi, prodhimi, shitja, ruajtja e ushqimeve të rrezikshme për shëndetin ose jetën e njerëzve”.
