Radio Televizioni Publik Shqiptar (RTSH) është kthyer në qendër të akuzave për korrupsion, konflikte interesi dhe skandale të njëpasnjëshme.
Dorëheqja e ish-drejtorit Alfred Peza ka nxjerrë në dritë detaje dhe dokumente që hedhin dritë mbi abuzimet brenda këtij institucioni.
Konflikti në RTSH është nxitur prej kohësh nga kryetari i Këshillit Drejtues, Leka Bungo, i cili, sipas raportimeve, ka luajtur një rol kyç në disa përplasje të brendshme.
Një nga skandalet më të mëdha të zbuluara lidhet me një kontratë mes Alfred Pezës dhe Leka Bungos, në të cilën ky i fundit, që mban postin e kreut të Këshillit Drejtues, përfiton miliona lekë për skenarin e Festivalit të Fundvitit në RTSH.
Ky veprim përbën një konflikt të hapur interesi, pasi fondet e festivalit janë miratuar nga Këshilli Drejtues, i kryesuar nga vetë Bungo.
KLSH ka raportuar se RTSH ka kryer veprime abuzive dhe me konflikte të pastra interesi, ndërsa dokumenti i publikuar nga CNA provon marrëveshjen klienteliste mes dy drejtuesve të lartë.
Për vite me radhë, Leka Bungo ka pasur përplasje me ish-drejtues të tjerë të RTSH-së, përfshirë Thoma Gëllçin, Martin Lekën dhe Enkelejd Jotin. Në të gjitha rastet, ai ka pretenduar se vepronte në emër të luftës kundër korrupsionit, por dokumentet e fundit tregojnë një tjetër realitet.
Sipas CNA, janë zhvilluar disa mbledhje ku Këshilli Drejtues nuk miratonte buxhetin e festivalit, duke bërë presion derisa të arrihej një marrëveshje për përfitimet financiare të Bungos. Buxheti fillestar ishte propozuar në shifra të larta, deri në 700 milionë lekë, dhe më pas është ulur për ta bërë të pranueshëm nga këshilli. Në fund, fondet janë miratuar dhe skenarin e festivalit e ka marrë vetë Bungo.
CNA paralajmëron se do të publikojë së shpejti fakte të tjera mbi këtë aferë, e cila, sipas burimeve të saj, do të dërgohet në SPAK për hetim. Dokumenti i firmosur më 29 dhjetor 2023, ku Alfred Peza dhe Leka Bungo shkëmbejnë favorizime financiare, është provë e qartë e një afere të madhe korruptive në RTSH.
Kjo situatë ngre pikëpyetje të mëdha mbi funksionimin e RTSH-së dhe përgjegjësinë e institucioneve për të hetuar dhe ndëshkuar personat përgjegjës për abuzimin me fondet publike dhe konfliktet e interesit.
