Në një nga zonat më piktoreske të Shqipërisë, pranë liqenit të Komanit, qytetarët kanë ngritur shqetësimin për një bllokim të padrejtë të hyrjes drejt bregut të liqenit dhe pyllit përreth.
Sipas tyre, një person privat ka vendosur tarifë kalimi prej 2 eurosh për person dhe 5 euro për makinë, duke penguar aksesin në një hapësirë që konsiderohet publike.
Në rrugën që të çon drejt bregut është vendosur edhe një tabelë me çmimet përkatëse dhe një numër kontakti, duke i dhënë kësaj nisme një pamje të organizuar, ndonëse pa asnjë informacion zyrtar mbi ligjshmërinë e veprimit.
Zona në fjalë është një destinacion i njohur për pushuesit vendas dhe të huaj, por ky veprim ka ngritur shqetësime për uzurpim të hapësirave publike dhe shfrytëzim të pasurive natyrore në mënyrë të paligjshme.
Ndërkohë që në zona të tjera të vendit institucionet ndërhyjnë për prishjen e ndërtimeve pa leje, në Koman, siç thonë qytetarët, po ndodh e kundërta ,hapësirat publike po privatizohen në heshtje.
“Për të hyrë në pyll dhe për të zbritur te uji duhet të paguash. Kanë vendosur tarifa sikur është pronë private. Ky është uzurpim i natyrës, ndërkohë që në vende të tjera shembin ndërtime pa leje,” shprehen qytetarët, duke kërkuar ndërhyrjen urgjente të institucioneve për të verifikuar ligjshmërinë e kësaj praktike dhe për të mbrojtur të drejtën e qytetarëve për të shijuar lirisht natyrën.
