Në një intervistë për emisionin “Kjo Javë” në News24, epidemiologu Artan Simaku u përgjigj pyetjeve të qytetarëve lidhur me linë e majmunit dhe situatën aktuale të COVID-19 në vend.
Kur është identifikuar rasti i parë i lisë së majmunit?
Simaku theksoi se rasti i parë me linë e majmunit në Shqipëri nuk është autokton, por është i importuar nga Italia.
“Pacienti nuk paraqiste simptoma të rënda që të kërkonte shtrim në spital dhe është trajtuar në shtëpi. Aktualisht ndodhet në fazën përfundimtare të negativizimit,” deklaroi ai.
Mjeku shtoi se lija e majmunit është një sëmundje kryesisht e lehtë dhe që nuk përhapet me shpejtësi. Ajo prek të gjitha grupmoshat dhe për të ekziston vaksinim për personat që janë në kontakt me raste të infektuara.
Deri më tani, në rajon janë raportuar raste të izoluara, një në Kosovë dhe dy në Maqedoninë e Veriut.
Simptomat dhe dallimet me sëmundje të tjera
Simaku shpjegoi se lija e majmunit nis me temperaturë, kollë dhe puçra, të cilat më pas shndërrohen në bulëza dhe plagë. Puçrat zakonisht shfaqen në fytyrë, duar dhe kokë.
Sëmundja mund të ngatërrohet lehtësisht me linë e dhenve për shkak të simptomave të ngjashme, por ka karakteristikat e veta. Transmetimi ndodh përmes kontaktit të ngushtë fizik, marrëdhënieve intime ose përmes përdorimit të sendeve të përbashkëta me të sëmurin.
COVID-19 – një virus që vijon të qarkullojë
Epidemiologu theksoi se COVID-19 nuk është zhdukur, por është shndërruar në një virus që qarkullon si gripi sezonal. Sipas tij, COVID-i ka tendencë të përhapet më shumë gjatë verës, ndërsa gripi është më i pranishëm në dimër.
“Numri i rasteve aktualisht është i ulët dhe pritet një rënie e mëtejshme gjatë muajve të verës, veçanërisht në korrik dhe gusht me rreth 6 mijë raste më pak,” u shpreh Simaku.
Si të dallojmë gripin nga COVID-i?
Dallimi kryesor mes gripit dhe COVID-it është temperatura. “Gripi zakonisht shkakton temperaturë 37-38 gradë, shoqëruar me rrufë dhe kollë.
Ndërsa COVID-i shfaqet me temperaturë më të lehtë dhe simptoma më të buta,” sqaroi mjeku.
Ai shtoi se COVID-i mund të transmetohet përmes mungesës së higjienës personale, ujin e ndotur, ose ushqimeve të pastruara keq. Grupmoshat më të rrezikuara mbeten fëmijët dhe të rinjtë.
Sipas Simakut, tashmë shumica e qytetarëve e kanë kaluar virusin dhe është e vështirë të dallohet nëse shqetësimet shëndetësore janë pasojë e infektimit apo efekt i vaksinimit.
