Situata e COVID-19 në vendin tonë vijon të përkeqësohet dita ditës, kjo pasi përveç pacientëve të infektuar në Spitalin Infektiv është shtuar edhe numri i personelit mjekësor të infektuar.
Pasditen e sotme mësohet se një tjetër mjek nga Puka është shtruar në Spitalin Infektiv, i infektuar me koronavirus, në gjendje të rëndë shëndetësore.
Momentalisht mjeku është në trajtim intensiv ndërsa gjendja e tij shëndetësore është rënduar së fundmi. Mjeku është infektuar nga një infermiere e cila e ka takuar përpara se të merrte përgjigjen e tamponit.
Kujtojmë se, pak ditë më parë ndërroi jetë në spitalin Infektiv mjeku Arjan Pushi, i infektuar me Covid-19. Pushi ishte personi i parë që ndërroi jetë nga radhët e mantelbardhëve, i prekur nga infeksioni i Covid-19.
Ndërkohë kujtojmë se 3 pacientë kanë ndërruar jetë në spitalin Infektiv në 24 orët e fundit, ndërsa janë shënuar 90 raste të reja me Covid 19. Personat që kanë humbur jetën janë një 57 vjeçar nga Shkodra, një 65 vjeçar nga Tirana dhe një 76 vjeçar nga Durrësi, me disa sëmundje bashkëshoqëruese kanë humbur jetën në spitalin infektiv, pavarësisht përpjekjeve të stafit mjekësor.