Disa ditë më parë në media qarkulluan foto nga qyteti i Durrësit, ku koshat e plehrave nuk “ishin prekur me dorë” nga punonjësit e bashkisë për shumë ditë me radhë.
Mbyllja e vend-depozitimit të Porto Romanos, solli që mbetjet e Bashkisë Durrës të dërgoheshin në Manzë për djegie.
Ditën e djeshme qyteti është pastruar, por këto mbeturina nuk janë depozituar asgjëkundi duke u bërë kështu një problematikë e madhe në një kohë që pritet të ringrihet sektori i turizmit në vend nga kriza ekonomike e pandemisë.
Por mesa duket, është arritur një marrëveshje për mbeturinat e qytetit të Durrësit, pas gjithë kaosit të krijuar ditët e fundit.
Kujtojmë këtu se jemi në pragun e sezonit turistik.
Sipas “AbcNews”, marrëveshja është dakordësuar mes bashkisë së Durrësit, qeverisë dhe drejtuesve të impiantit të përpunimit në Sharrë, për transportimin e mbetjeve drejt Sharrës pa pagesë për 4 muaj.
Depozitimi i mbetjeve në Sharrë kapte vlerën 29 euro/ton, dhe bashkia u përball me mungesën e fondeve për të dërguar dhe trajtuar mbetjet e saj në Sharrë.
Është mësuar se ditën e nesërme kryebashkiakja e Durrësit është thirrur në Kryeministri, ku do të takohet me kryeministrin Edi Rama.
Me rritjen e temperaturave, kjo situatë po kthehej në një problematikë serioze, e ndërkohë që Ministria e Mjedisit ende nuk ka dalë në ndonjë deklaratë të saj për këtë situatë alarmante.
Pak minuta më parë ka reaguar në “Twitter” edhe kryeministri Edi Rama, i cili shprehet se nuk do të ketë hedhje plehrash në asnjë zonë të bashkisë në këtë fazë tranzicioni!
Sipas kryeministrit nuk duhet keqpërdorur, shqetësimi i durrsakëve për të nxitur shfaqjet e pakënaqësisë që ushqehet me lajme të rreme.
“Në vend që ta dizinformojnë publikun dhe të keqpërdorin shqetësimin qytetar, për audiencë dhe për të nxitur shfaqjet e pakënaqësisë që ushqehet me lajme të rreme, mediat duhet t’u thonë durrsakëve se s’do të ketë hedhje plehrash në asnjë zonë të bashkisë në këtë fazë tranzicioni!”, shkruan Rama.
Në vend që ta dizinformojnë publikun dhe të keqpërdorin shqetësimin qytetar, për audiencë dhe për të nxitur shfaqjet e pakënaqësisë që ushqehet me lajme të rreme, mediat duhet t’u thonë durrsakëve se s’do të ketë hedhje plehrash në asnjë zonë të bashkisë në këtë fazë tranzicioni!
— Edi Rama (@ediramaal) June 16, 2020
