Silva Caka nga Partia e Lirisë, e ftuar në rubrikën Opinion në News 24 foli për dosjen e SPAK ndaj presidentit të PL Ilir Meta.
Caka tha se dosja për Metën është një paçavure dhe se Partia e Lirisë pret që presidenti i partisë të dalë nga burgu.
“Opozita nuk do që të shkojë në zgjedhje ashtu siç do dëshiron Edi Rama dhe Altin Dumani. Presim që Meta të dalë nga burgu. Çfarë roli ka Meta në atë dosjen me mbi 100 faqe, se nuk e shoh emrin e tij të përmendur në asnjë nga ato katër akuzat që i janë ngritur. Nuk burgosen njerëzit me deduksione, aq më tepër kur kanë peshë politike. Nëse ndodh kjo, atëherë duhet të ngremë pyetjen se ku po jetojmë. Kjo është pikëpyetja që ngremë, prandaj ishte dhe ajo protestë sot para SPAK. Aferat që janë denoncuar të kësaj qeverie nuk janë vetëm për korrupsion.
Mos harrojmë se kemi një aferë si ajo për Ballkanin e Hapur, kemi çështjen e detit që është kundërshtuar me forcë kur Meta ishte president etj. Të gjitha janë akumuluar. Ka dyshime se në shpalljen e non grates të Berishës ka gisht edhe kryeministri. PD-së iu mor vula, iu mor logo e partisë e me radhë dhe shkoi deri tek arrestimi i liderit të partisë. Kështu ndodhi edhe me Ilir Metën. Meta ka pasur beteja të jashtëzakonshme në parlament. Nuk është se ne nuk prisnim se kjo do ndodhte, sepse ishte i njëjti udhëtim, pra nisi në një formë, në një formë derisa as Berisha e as Meta nuk kishte ndërmend të bënte rolin që bën Basha dhe sigurisht erdhëm në arrestime të dhunshme. Dosja për Metën është paçavure ku të përfshirë janë të tjerë njerëz dhe arrestohet një njeri tjetër. Ne presim që Meta të dalë së shpejti nga burgu”, deklaroi Caka.
