Aksidentet rrugore mbeten një nga shkaktarët kryesorë të vdekjeve dhe invaliditetit në Europë, ku çdo vit humbin jetën mbi 62,000 persona, ndërsa rreth 892,000 të tjerë plagosen rëndë.
Sipas Organizatës Botërore të Shëndetësisë, këmbësorët dhe çiklistët përbëjnë të paktën një të tretën e viktimave në këto aksidente.
Në bazë të këtyre të dhënave, ekspertët shëndetësorë ndërkombëtarë kanë dhënë rekomandime të qarta për të gjithë vendet, përfshirë edhe Shqipërinë, me qëllim përmirësimin e sigurisë në ecje dhe çiklizëm.
Ata sugjerojnë që në zonat ku trafiku i automjeteve përzihet me lëvizjen e këmbësorëve dhe çiklistëve, kufizimi i shpejtësisë të jetë jo më shumë se 30 km/orë. Gjithashtu, duhet të krijohen shtigje të veçanta për këmbësorët dhe biçikletat, larg trafikut të rëndë dhe me shpejtësi të lartë. Për çiklistët, përdorimi i helmetave cilësore duhet të jetë i detyrueshëm.
Sipas ekspertëve, këto masa do të kontribuojnë në sigurimin e një ambienti më të sigurt për ecjen dhe çiklizmin, duke nxitur kështu shëndetin publik, zhvillimin e qëndrueshëm të qyteteve dhe përmirësimin e barazisë sociale.
