Kreu i Grupit Parlamentar të Partisë Socialiste, Taulant Balla në një deklaratë për mediat pas përfundimit të Asamblesë së PS-së i është përgjigjur edhe kryedemokratit Lulzim Basha. Kujtojmë se Basha më herët ditën e sotme e konsideroi Partinë Socialiste si “stallë lopësh”. Balla në deklaratën për mediat u shpreh se “nuk ka çfarë t’i thotë Bashës”. Më tej ai tha se pavarësisht këtyre komenteve, Partia Socialiste do të vazhdojë të mbajë dorën shtrirë për bashkëpunimin me Partinë Demokratike. Balla thotë se për ta nuk ka rëndësi kush i fiton zgjedhjet për kryetar në PD dhe se PS-ja do të jetë e gatshme të bashkëpunojë me këdo që do të jet kryetar i PD-së.
“Çfarë të them unë për Lulin…Minimalisht Luli kur i referohet Partisë Socialiste, duhet t’i referohet një partie që ka një mirëorganizim të pakrahasueshëm dhe të gjithë anëtarët e vet i ka të disponueshëm. Por nuk dua t’i futem këtyre gjërave në atë parti, ku nuk dihet kush do të votojë për kryetarin më 13 qershor. Ne do e mbajmë dorën e shtrirë dhe dëshirën tonë të pakushtëzuar për t’u ulur me PD-në sapo të fillojë legjislatura e re, me këdo që do jetë kryetar i PD. Maxhoranca ka detyrat e veta, opozita ka detyrat e veta,”- tha Taulant Balla.
