Shtyhet seanca për Veliajn pas kërkesës së avokatit

Seanca për kryebashkiakun Erion Veliaj në GJKKO është ndërprerë pasi avokati kërkoi më shumë kohë për t’u njohur me dosjen.

Seanca është shtyrë për në orën 13:30. Ajo duhej të fillonte në orën 08:30, por pati një vonesë prej 30 minutash për shkak të ndërprerjes së energjisë elektrike në GJKKO.

Në të njëjtën seancë janë të pranishëm edhe biznesmeni Elman Abule, i dyshuar për pastrim parash, dhe pesë të tjerë që janë nën masën e detyrimit për paraqitje, Gentian Sula, Fatmir Bektashi, Meriman Palushi, Sokol Kryeziu dhe Shkëlqim Fusha.

Kryebashkiaku Veliaj u arrestua më 10 shkurt nga SPAK dhe BKH në Bashkinë e Tiranës.

Për të janë lëshuar 5 masa sigurie nga Gjykata e Posaçme.

Për bashkëshorten e tij, Ajola Xoxa, është caktuar masa “arrest në shtëpi”, ndërsa Gentian Sula, Meriman Palushi, Fatmir Bektashi, Sokol Kryeziu dhe Shkëlqim Fusha janë vënë në detyrim paraqitje.