Mbyllet pas 6 orësh seanca ndaj Saimir Tahirit, ku është vendosur që vendimi për ish-ministrin e Brendshëm të merret në orën 09:30 në datë 24 qershor.
Tahiri ka paraqitur një mbrojtje prej 138 faqesh, ndërkohë që prokurorët e çështjes kanë kërkuar shfuqizim të dënimit të konvertuar në shërbim prove.
Në fjalën e tij para gazetarëve, Tahiri tha se ka respektuar drejtësinë dhe se ka zbatuar detyrën edhe më mirë se ata që janë tani në post.
As sot ai nuk dha prova se ku bazohet për të kërkuar pafajësinë, teksa e ka quajtur komike historinë e gjyqit të tij.
“Unë nuk kam folur shumë gjatë gjatë kohës që kam qenë në gjyq dhe i akuzuar për të respektuar drejtësinë, e kam bërë sikur e konceptoj raportin tim me drejtësinë. Jam i vetmi që lash mandatin për t’u përballuar si qytetar i thjeshtë me drejtësinë. Besoj te drejtësia, por nuk ka rëndësi për mua nëse do të vijë drejtia nga gjykata apo është drejtësia që besoj unë. Para të gjithëve jam super i bindur që kam bërë në cdo hap të punës sime gjënë e duhur, jo më për akuzat e prokurorisë, por edhe të gjykatës të shpërdorimit të detyrës, e kam bërë më mirë se ata që ishin dhe ata që janë. “
I pyetur nëse do rikthehet sërish në politikë në zgjidhjet e vitit të ardhshëm, ai tha se Saimir Tahiri nuk ka ikur dhe se kjo historia e politikës nuk e tundon.
Prokuroria e përfaqësuar nga Vladimir Mara dhe Dritan Prenci nuk tërhiqen nga akuzat dhe dënimi 12 vite që kërkoi në Shkallën e Parë, teksa Saimir Tahiri dhe avokati i tij Maks Haxhia kanë përgatitur një mbrojtje prej 131 faqesh.
Trupa gjyqësore në Apel përbëhej nga Albana Boksi, Nertina Kosova dhe Nure Dreni.
Ish-ministri i Brendshëm Saimir Tahiri u vu nën akuzë pas arrestimit të grupit “Habilaj” ndërsa që në fillim ai pretendoi pafajësi duke e quajtur një proces farsë me prova të montuara.
Në shtator të vitit të kaluar ish-Prokuroria e Krimeve kërkoi dënimin e tij me 12 vite, ndërsa për shkak të gjykimit të shkurtuar shkonte 8 vite, por gjykata e dënoi Tahirin me 3 vite burg me shërbim prove.
Të dy palët nuk u kënaqën duke e apeluar vendimin, prokuroria që nuk tërhiqet nga kërkesa për dënimin e tij me 12 vite, ndërsa ish-ministri kërkon pafajësi të plotë.
Tahiri akuzohet për 3 vepra penale “trafikim i narkotikëve” në bashkëpunim në formën e grupit të strukturuar kriminal, “kryerja e veprave penale nga organizata kriminale”, “grup i strukturuar kriminal”.
Prokuroria e akuzonte Tahirin se në kohën kur ishte ministër i Brendshëm bashkë me ish- drejtorin e Policisë Vlorë, Jaeld Çela kanë bashkëpunuar me Moisi Habilajn.
