Ndërkohë që emigracioni i shqiptarëve drejt vendeve të tjera mbetet i lartë, qeveria ka gjetur zgjiidhjen se si të “rikuperojë dëmet”.
Sipas ministrit të Brendshëm Blendi Çuçi pas mbledhjes së këshillit të Ministrave është marrë vendimi për dhënien e shtetësisë shqiptare për të gjithë personalitetet e huaja që kanë spikatur në fusha të ndryshme në vendin tonë.
Gjithashtu Çuçi theksoi se kjo gjë do sjellë më shumë talente në vend që mund të na përfaqësojnë në kompeticione ndërkombëtare.
“Vendimi që u mor sot ishte dhënia e shtetësisë shqiptare për shtetasit e huaj që kanë spikatur me kontributet e tyre në fushën e arsimit, shkencës dhe sportit. Kjo vjen si plotësim neni për ligjin e ri që kemi miratuar për këtë të drejtë dhe përcakton të gjitha kriteret dhe afatet e dhënies sa më shpejt të shtetësisë nga institucionet. Me këtë vendim jo vetëm që i trajtojmë në mënyrë të veçantë për këto personalitete por thithim dhe rekordmenë që mund të përfaqësojne shtetin shqiptar në kompeticione ndërkombëtare”, u shpreh Çuçi.
Të rinjtë shqiptarë shikojnë si opsion shtetet e tjera për të ushtruar profesionin dhe kompetencat e tyre, ndërkohë që mesa duket na duhen përpjekje për të tërhequr talente dhe persona më të aftë nga jashtë vendit.
Një veprim efikas i qeverisë do të konsistonte në investimin tek “truri” në vend , për ta mbajtur fort dhe për të minimizuar dëshirën e tij drejt emigracionit.
