Shqipëria po zbrazet, por spitalet mbeten të mbingarkuara! Humbëm një në katër banorë në 25 vjet

Shqipëria po përjeton një nga krizat më të rënda demografike në historinë e saj. Në vetëm 25 vjet, vendi ka humbur rreth 721 mijë banorë, ose gati një në katër shqiptarë, duke regjistruar rënien më të madhe të popullsisë në të gjithë Europën.

Sipas të dhënave të Eurostat dhe INSTAT, popullsia ka rënë nga 3.06 milionë banorë në vitin 2000 në vetëm 2.34 milionë në fillim të vitit 2026. Shkaku kryesor mbetet emigracioni masiv, i shoqëruar me rënien e lindjeve dhe plakjen e shpejtë të popullsisë. Vetëm pas pandemisë, mbi 166 mijë shqiptarë janë larguar nga vendi, ndërsa mosha mesatare ka arritur në 45 vjeç dhe lindjet kanë zbritur në nivelin më të ulët historik.

Por tkurrja e popullsisë nuk e ka lehtësuar sistemin shëndetësor. Përkundrazi.

Shqipëria vazhdon të jetë ndër vendet me më pak shtretër spitalorë në Europë. Në vitin 2024 kishte vetëm 372 shtretër për 100 mijë banorë, shumë më pak se mesatarja e Bashkimit Europian prej 507 shtretërsh. Edhe pse popullsia është pakësuar ndjeshëm, përmirësimi i këtij treguesi ka ardhur kryesisht sepse ka më pak banorë dhe jo sepse janë bërë investime të mëdha në spitale.

Në të njëjtën kohë, plakja e popullsisë po rrit numrin e pacientëve që kanë nevojë për trajtim, shumë mjekë po largohen jashtë vendit dhe spitalet e Tiranës po mbajnë barrën më të madhe të rasteve të rënda.

Ndërsa Shqipëria po humbet të rinjtë, familjet dhe profesionistët, shumë vende të Bashkimit Europian po rrisin popullsinë falë emigracionit. Kjo po krijon dy realitete krejt të ndryshme: vendet e zhvilluara po tërheqin fuqi punëtore dhe po mbështesin ekonomitë e tyre, ndërsa Shqipëria po përballet me pasojat e largimit masiv të qytetarëve, mungesën e punonjësve dhe një popullsi që po plaket me ritme alarmante.