Shqipëria nuk arriti të marrë tre pikët në ndeshjen ndaj Letonisë, duke barazuar 1-1 në transfertën e Riga-s dhe duke komplikuar dukshëm pozitat në Grupin K të kualifikueseve për Kupën e Botës 2026.
Ndeshja nisi me intensitet të lartë nga të dyja skuadrat, të cilat shkëmbyen sulme dhe rrezikuan në zonat përkatëse. Momenti i parë i rëndësishëm erdhi në minutën e 21-të, kur Letonia fitoi një penallti, por portieri Thomas Strakosha priti goditjen e Ikaunieks dhe mbajti portën të paprekur.
Vetëm tetë minuta më pas, kuqezinjtë kaluan në avantazh pas një aksioni të ngatërruar në zonën leteone. Mbrojtësi Cernomordijs, në përpjekje për të larguar topin, devijoi në rrjetën e vet duke i dhuruar Shqipërisë golin e parë.
Në minutat e fundit të pjesës së parë, një përgjumje në repartin mbrojtës të Shqipërisë i kushtoi rëndë skuadrës së drejtuar nga trajneri Sylvinho. Ishte sërish Cernomordijs që u përfshi në rezultat, këtë herë duke shënuar në portën e duhur dhe duke vendosur baraspeshën.
Pjesa e dytë u karakterizua nga mungesa e rasteve të pastra për shënim. Letonia u mjaftua me administrimin e rezultatit dhe mbrojtjen e pikës, ndërsa kuqezinjtë nuk arritën të gjenin mekanizmin për të ndryshuar fatin e sfidës.
Pas këtij barazimi, Shqipëria mban vendin e dytë në grup me 5 pikë, vetëm një më shumë se Serbia dhe Letonia, por me dy ndeshje më shumë të luajtura se serbët. Takimi i radhës për kuqezinjtë do të zhvillohet më 9 shtator në Tiranë, sërish ndaj Letonisë, në një përballje që mund të jetë vendimtare për fatet e kualifikimit.
