Situata e koronavirusit në vendin tonë po vjen duke u përkeqësuar, pasi vetëm në 24 orët e fundit janë shënuar 2 viktima dhe 15 raste të reja.
Me rritjen e numrit të viktimave dhe të prekurve, situata bëhet kritike, duke qenë se në Shqipëri nuk ka mjaftueshëm ventilatorë.
Në total thuhet se në vendin tonë janë 140 ventilatorë, shifër kjo e pamjaftueshme, ndërsa Ministria e Shëndetësisë vijon të mbajë të fshehtë numrin real të këtyre pajisjeve.
Ndërkohë stomatologu i njohur Gjergj Dilo, ka bërë publike nismën fantastike të dy miqve të tij laborantë dentarë, Besar Lalike dhe Eldan Cepeli, të cilët me shpenzimet e tyre, po realizojnë pjesë për ventilatorët që mbajnë në jetë pacientët në gjendje të rëndë.
“Besar Lalike dhe Eldian Cepeli kanë marrë përsipër me shpenzimet e tyre, të prodhojnë në laborator pjesë të aparateve të ventilimit. Këto pjesë do mundësojnë që me një aparat të vetëm, të lidhet dhe të mbahet në jetë jo 1, por deri në 4 pacientë. Kjo gjë do na mundësonte shpresat për të mbajtur në jetë 4-fishin e pacientëve që janë në stad të rëndë dhe kanë nevojë për ventilim”, shkruan Dilo.
Burime për “Iconstyle.al”, bëjnë me dije se laborantët, të cilët operojnë në Vlorë dhe Kavajë, me anë të aparateve të printimit, 3D, synojnë të prodhojnë pjesët e nevojshme për ventilatorët.
Kjo do të ishte një ndihmë shumë e madhe për pacientët të cilët shfaqin komplikacione me frymëmarrjen.
Një nismë e tillë është marrë edhe në qytezën e Chiari-t në Itali, ku një kompani printimi 3D, ka prodhuar valvula të nevojshme për ventilatorët.
Në Bologna tre ditë më parë, është testuar me sukses në ventilator i prodhuar nga kompania “Intersurgical”, që mund të furnizojë me oksigjen dy të sëmurë në të njëjtën kohë, ndërsa në amerikë po kryhet një studim për furnizimin me oksigjen për 4 pacientë njëherësh.
“Iconstyle.al”, ka mësuar se laborantët shqiptarë kanë marrë udhëzime nga Bologna për ndërtimin e prototipit, i cili do t’i dërgohet më pas QSUT, për t’u testuar.
Për momentin projekti është në fazën e eksperimentit, pasi ndërtimi i këtyre pjesëve është i komplikuar.
Për këtë arsye, Dilo ka kërkuar mbështetje, duke u bërë apel të gjithë profesionistëve dentarë.
“Ky status i imi nuk është që ju të jepni like apo t’i thoni bravo këtyre çunave.
Ky status i imi është apel për ndihmë të tërë profesionistëve dentarë: kush disponon rezinë për printer ky është momenti kur duhet më shumë se kurrë!!! Nuk është momenti të prodhojmë dhëmbë apo proteza të bukura…është momenti të shpëtojmë jetë!!!”, ka shkruar ai.
