Ambasadorja e SHBA, Yuri Kim ka thënë se Uashingtoni pret që palët politike t’i njohin zgjedhjet e 25 prillit e të mendojnë si t’i shërbejnë popullit shqiptar. Në emisionin “Opinion” ajo tha se SHBA pret me kënaqësi që të punojë me të gjitha palët dhe më e rëndësishmja për të është se Shqipëria ka qenë për një kohë të gjatë pa opozitë në parlament. Kim komentoi edhe deklaratat e Lulzim Bashës që e bëjnë të qartë se do të jenë në parlament në shtator.
“Mendoj se për Shtetet e Bashkuara, pikëpamja jonë është shumë e qartë. Në deklaratën që nxorëm nga Uashingtoni, vërejtëm se është me rëndësi që të gjitha partitë të njohin rezultatet e zgjedhjeve, dhe për sa është e mundur, që partitë tani të mendojnë se si t’i shërbejnë popullit shqiptar, të gjithë popullit shqiptar. Pra, po presim me kënaqësi që të punojmë me të gjitha palët, të shohim se çfarë mund të bëjmë sëbasku si Shtetet e Bashkuara dhe Shqipëria, dhe më duhet të them se më e rëndësishmja për ne është që Shqipëria ka qenë tepër gjatë pa një opozitë të plotë në parlament.
Mendoj se gjithçka tjetër që mund të jenë duke thënë, po të shohësh deklaratat nga Lulzim Basha dhe kushdo tjetër në PD, bëjnë shumë të qartë që pavarësisht çfarëdo kundërshtimesh që kanë, do të jenë në parlament në shtator. Dhe kjo është vërtet e rëndësishme”, ka thënë Kim.
