Departamenti Amerikan i Shtetit ka shpallur një program të ri pilot 12-mujor, që parashikon vendosjen e garancive financiare deri në 15 mijë dollarë për disa aplikantë për viza turistike dhe biznesi.
Programi do të hyjë në fuqi më 20 gusht dhe fillimisht do të zbatohet për shtetasit e Malauit dhe Zambias, dy vende të Afrikës Jugore dhe Juglindore.
Shqipëria, të paktën për momentin, nuk përfshihet në këtë skemë të re. Burime nga Ministria e Jashtme shqiptare konfirmojnë se nuk ka ndonjë njoftim zyrtar që e përfshin vendin në këtë projekt, por theksojnë se me zbatimin e tij, lista e shteteve mund të zgjerohet dhe çdo vend i përfshirë do të njoftohet në kohë.
Skema e re parashikon tre nivele garancish, 5 mijë, 10 mijë dhe 15 mijë dollarë, të cilat do të përcaktohen nga punonjësit konsullorë të ambasadave amerikane, në bazë të riskut të shkeljes së afatit të vizës nga aplikanti. Ndër kriteret kryesore për vlerësim është edhe historiku i udhëtimeve të mëparshme.
Sipas të dhënave të Departamentit amerikan për Sigurinë e Brendshme për vitin 2023, rreth 42% e të huajve që aktualisht jetojnë në SHBA kanë hyrë me vizë të rregullt, por nuk janë larguar pas skadimit të afatit. Ndër vendet me përqindjen më të lartë të shkeljeve të këtij afati janë: Çadi (50%), Laosi (35%) dhe Haiti (31%).
Për Shqipërinë, niveli i shkeljes së afateve të vizave është raportuar në rreth 2.3%, një përqindje dukshëm më e ulët krahasuar me vendet në fokus të këtij programi. Edhe Malaui dhe Zambia, për të cilat zbatohet fillimisht programi, kanë shifra relativisht të moderuara që variojnë mes 10% dhe 14%.
Ndërsa vendet me numrin më të madh absolut të shkelësve të vizave përfshijnë Meksikën, Kolumbinë dhe Haitin, që konsiderohen si burime kryesore të imigracionit të parregullt drejt SHBA-së.
