Qeveria ka hequr thuajse tërësisht kufizimet për punëtorët e huaj, duke hapur tregun e punës edhe për shtetet joanëtare të Bashkimit Europian.
Në mbledhjen e fundit të këshillit të ministrave është hartuar një projektligj i ri, i cili do t’i dërgohet parlamentit për miratim.
Sipas këtij drafti, shtetasit e pesë vendeve fqinje të Ballkanit Perëndimor, si Serbia, Bosnja, Kosova, Mali i Zi, dhe Maqedonia e Veriut nuk do të kenë më nevojë për leje punë për tu punësuar në Shqipëri.
Leja e punës për ta do të hiqet në mënyrë të përhershme.
Po ashtu, leja e punës hiqet për çdo të huaj, që do të punësohet në sektorë të ndryshëm me qëllim rregullimin e pasojave dhe rimëkëmbjen nga fatkeqësi natyrore.
Rrjedhimisht, ai u jep mundësi bizneseve shqiptare, që do të punojnë në ndërtimin e banesave nga tërmeti, të punësojnë punëtorë nga çdo vend i botës, pa patur nevojë për leje pune.
Liberalizimi i tregut të punës është hedhur fillimisht si ide nga disa biznese të mëdha vendase.
Kjo është shoqëruar me debate të shumta për shkak të nivelit të lartë të papunësisë.
Por, qeveria dhe bizneset e kanë justifikuar këtë masë me argumentin se vendi ka mungesë punëtorësh.
