Dita e Alfabetit të Gjuhës Shqipe, që përkujton Kongresin e Manastirit të vitit 1908, u shpall festë zyrtare në Shqipëri.
Ministri për Europën dhe Punët e Jashtme, gjatë propozimit të këtij ndryshimi, theksoi rëndësinë e kësaj ngjarjeje historike si moment unifikues për shqiptarët.
Megjithatë, 116 vite pas kësaj arritjeje madhore, Shqipëria përballet me sfidën e rënies së ndjeshme të regjistrimeve në arsimin fillor, duke rrezikuar rritjen e analfabetizmit.
Të dhënat e Bankës Botërore tregojnë se norma bruto e regjistrimit në shkollat fillore ra në 93.7% në vitin 2023, nga 105.4% në vitin 2017, duke shënuar nivelin më të ulët që nga viti 1976. Shqipëria renditet e pesta për normën më të ulët të regjistrimit në arsimin fillor në Europë, pas Rumanisë, Bosnjë-Hercegovinës, Ukrainës dhe Maltës.
Kjo rënie shqetësuese lidhet me faktorë si emigrimi, që prek sidomos fëmijët në arsimin e detyruar, dhe përkeqësimi i treguesve të shkollimit te vajzat.
Një tjetër shqetësim është përkeqësimi i cilësisë së mësimdhënies, siç treguan rezultatet e dobëta të Shqipërisë në testin ndërkombëtar PISA.
Ekspertët paralajmërojnë se kjo situatë mund të çojë në uljen e nivelit të përgjithshëm të shkollimit, rritjen e analfabetizmit, dhe përkeqësimin e pabarazive mes zonave urbane dhe rurale. Arsimi, si bazë e zhvillimit të çdo kombi, mbetet një sfidë kritike për Shqipërinë./Monitor
