Një ditë pas aksidentit të rëndë në “Qafën e Koshovicës”, polici i qarkullimit Klajdi Mustaj ndan përjetimet e tij si dëshmitar dhe shpëtimtar i katër personave të lënduar.
29-vjeçari nga Fier, i cili dikur ka punuar si jurist në Bashkinë Mallakastër dhe më pas ka vendosur të bëhet pjesë e policisë, u bë “heroi i ditës” pasi rrezikoi jetën për të nxjerrë të plagosurit nga një automjet tip “Benz” që u përmbys në këtë zonë.
Ngjarja ndodhi kur shoferi humbi kontrollin e mjetit, i cili doli nga rruga dhe u përmbys. Klajdi veproi menjëherë, duke dalë në ndihmë të katër personave brenda makinës.
Ai rrëfen se instinkti e shtyu të ndërhynte për të nxjerrë trupat e viktimave para se makina të përfshihej nga flakët që shpërthyen pak çaste më vonë. Pavarësisht pranisë së rreth 30 personave në vendngjarje, vetëm ai ndërmori veprime, duke marrë mbi supe përgjegjësinë e shpëtimit.
“Nuk mund ta quaj veten hero,” thotë Klajdi, “sepse çdo punonjës policie është i trajnuar për situata të tilla dhe duhet të veprojë me humanizëm dhe gjakftohtësi.”
Ai kujton me qetësi momentet dramatike, duke thënë: “Mbaj mend që kam bërë të mundur nxjerrjen e një fëmije nga mjeti fillimisht dhe për disa sekonda kam shuar zjarrin. Më pas kam nxjerrë drejtuesin dhe pasagjerët e tjerë.”
Edhe pse ende nuk ka kontaktuar me familjarët e të lënduarve, për Klajdin fokusi kryesor mbetet rikuperimi i tyre shëndetësor.
“Nuk mendova më as për jetën time teksa dëgjoja thirrjet për ndihmë brenda mjetit,” shpjegon ai. I pyetur nëse do të vepronte njësoj në një situatë të ngjashme, ai përgjigjet pa hezitim: “Do të bëja sërish të njëjtën gjë pa u menduar dy herë nëse do të rastisja në tjetër situatë të njëjtë.”
Polici shton se detyra e tyre është të shpëtojnë jetë, pavarësisht situatës, si gjatë kohës së shërbimit ashtu edhe jashtë tij. Ai tregon se ka pasur gjithmonë dëshirë të bëhej pjesë e uniformave blu dhe për këtë ndihet krenar.
Klajdi u bën apel të gjithë drejtuesve të automjeteve që të tregojnë kujdes dhe të respektojnë rregullat e qarkullimit rrugor, pasi edhe një gabim i vogël mund të sjellë pasoja tragjike.
