Shpërthim me tritol në një lokal në Tiranë

Një shpërthim me lëndë plasëse ka tronditur kryeqytetin në orët e para të mëngjesit të sotëm. Ngjarja është shënuar në Rrugën e Durrësit, ku eksplozivi ishte vendosur pranë hyrjes së një lokali.

Fatmirësisht, nuk raportohet për të lënduar, por shpërthimi ka shkaktuar panik dhe dëme materiale në ambientet e biznesit.

Forcat e policisë mbërritën menjëherë në vendngjarje dhe kanë nisur hetimet për të zbardhur motivet dhe autorët e mundshëm të ngjarjes.

Njoftimi i Policisë:

Tiranë/Informacion paraprak

Rreth orës 03:45, në Rrugën e Durrësit, në lokalin në pronësi të shtetasit A. S., dyshohet se ka plasur një sasi e vogël lënde plasëse, e vendosur pranë derës hyrëse të lokalit.

Si pasojë janë shkaktuar vetëm dëme materiale. Nuk ka persona të lënduar. Grupi hetimor po vijon punën për identifikimin dhe kapjen e autorit/autorëve, si dhe për zbardhjen e plotë të rrethanave të ngjarjes.