Një banesë është shkrumbuar nga flakët në qytetin e Krujës, por fatmirësisht pa lëndime në njerëz, vetëm dëme materiale. Mbrëmjen e së hënës banesa e Pëllumb Kiçit, banues në në fshatin Granze të Krujës është përfshirë nga flakët. Mësohet se pasi kanë parë flakët familjarët kanë lajmëruar zjarrfikësit e Krujës, por kur ata mbërritën në vendngjarje çdo gjë ishte shkrumbuar. Po ashtu sipas familjarëve, për rëninen e zjarrit shkak janë bërë kabllot e tensionit, megjithatë pritet zbardhja e ngjarjes nga specialistet e hetimit. Familja Kiçi tashmë ka mbetur në qiell të hapur dhe u bën apel institucioneve për ndihmë.
Ndërkohë përfshirja e banesave në flakë duket se është bërë e shpeshtë kohët e fundit dhe pse fatmirësisht nuk ka pasur viktima, ato kanë përhapur panik te qytetarët e zonës. Kujtojmë pak kohë më parë kati i tretë i një ndërtese në Kamëz u dogj pas një shpërthimi të një bomble gazi. Si pasojë e flakëve u shënuan dëme të shumta materiale. Zjarri i rënë rrezikoi edhe ndërtesa të tjera, por edhe banorë të cilët ishin aty pranë. Fatmirësisht në ambientet e brendshme në momentin e shpërthimit të flakëve nuk pati njerëz. Zjarrëfikësve iu deshën të paktën 2 orë të neutralizonin flakët dhe vendosnin situatën nën kontroll, teksa për shkak të afërsisë së ndërtimeve të tjera, ngjarja paraqiste rrezikshmëri të lartë.