Një grup i fuqishëm ndërkombëtar i drogërave të forta, kryesisht kokainë, i cili operonte nga Amerika Latine drejt tregut evropian, është shkatërruar përgjatë kësaj jave nga një operacion ndërkombëtar dhe nga Policia gjyqësore Federale belge.
Policia belge ka arritur që të arrestojë 17 persona në Antwerp, kryesisht nga Shqipëria. Nga kontrollet në banesa autoritete gjetën 40 kg drogë, një armë zjarri dhe më shumë se 200 mijë dollarë, si dhe disa automjete.
Hetimet kishin nisur që prej fundit të vitit 2019 pas një informacioni nga autoritetet gjermane. Më pas rezultoi se banda transportonte kokainë nga Amerika e Jugut në disa porte europiane. Gjatë hetimeve policia belge bashkëpunoi me forcat gjermane, holandeze, shqiptare dhe italiane.
Të martën dhe të mërkurën policia bastisi 11 shtëpi ku arriti të arrestojë 17 persona. 9 prej tyre kishin rolin e organizatorit dhe ndihmoheshin nga anëtarët e tjerë të bandës për të tërhequr drogën nga portet.
Grupi operonte ndërkombëtarisht dhe kontrabandonte sasi të mëdha lëndësh narkotike, kryesisht kokainë në Europë, nëpërmjet porteve të mëdha.
Policia belge ra në gjurmët e grupit në fundin e vitit të shkuar, bazuar në informacionin e marrë nga autoritetet gjermane.
Krerët e organizatës përdorën kufijtë e vendeve të ndryshme evropiane duke u përpjekur që të qëndrojnë nën radarin e policisë dhe gjyqësorit.
Gjatë hetimit, forcat e policisë belge bashkëpunuan me forcat policore gjermane, holandeze, shqiptare dhe italiane për të patur një lëvizje të qartë të të gjithë rrjetit.
Ky bashkëpunim çoi në konfiskimin e kokainës në portet e Antwerp (57 kg), Vlissingen në Hollandë (50 kg) dhe Civitavecchia në Itali (80 kg). Në total, grupi pritej të përfitonte rreth 9 milionë euro nga shitja e lëndës narkotike./Gazetareforma.com/
