Më 23 korrik të vitit të kaluar Komisioni i Pavarur i Kualifikimit vendosi shkarkimin nga detyra të Arben Nelës, pasi nuk justifikonte 3 apartamente dhe një shumë parash rreth 12 mijë euro.
Arben Nela nuk u pajtua me vendimin dhe e dërgoi në Kolegjin e Posaçëm të Apelimit.
Ndërkohë dhe Kolegji i Posaçëm i Apelimit e ka lënë në fuqi vendimin e shkarkimit nga detyra të prokurorit Arben Nela, numri dy i prokurorisë së Tiranës.
Nela filloi punë si prokuror në Prokurorinë e Fierit në vitin 1998. Ai u transferua në Durrës në vitin 2006, ndërsa në vitin 2008 u transferua në Tiranë, ku mbante postin e zëvendësprokurorit para se të përfshihej në procesin e rivlerësimit.
VENDIMI I PLOTË I KOLEGJIT TË APELIMIT
Trupi gjykues i Kolegjit të Posaçëm të Apelimit kryesuar nga Rezarta Schuetz, Natasha Mulaj relatore dhe anëtarë Albana Shtylla, Ina Rama, Sokol Çomo, sot, më datë 16.04.2019, shqyrtoi në dhomë këshillimi, çështjen (JR) nr.28/2018, datë 05.11.2018 që i përket ankimit të subjektit të rivlerësimit Arben Nela kundër vendimit nr. 44, datë 23.07.2018 të Komisionit të Pavarur të Kualifikimit.
Në përfundim të gjykimit, bazuar në nenin 66, pika 1, germa “a”, të ligjit nr.84/2016 “Për rivlerësimin kalimtar të gjyqtarëve dhe prokurorëve në Republikën e Shqipërisë”, trupi gjykues i Kolegjit të Posaçëm të Apelimit, në mënyrë unanime, vendosi:
- Lënien në fuqi të vendimit nr. 44, datë 23.07.2018, të Komisionit të Pavarur të Kualifikimit që i përket subjektit të rivlerësimit Arben Nela.
- Ky vendim është përfundimtar, me efekt të menjëhershëm.
U shpall sot në Tiranë, më datë 16.04.2019.
