Ditën e sotme është shkarkuar nga detyra Drejtuesja e Prokurorisë së Kukësit, Alketa Nushi. Vendimi është dhënë nga KPK që drejtohej nga Etleda Çiftja.
Relatori i çështjes, Lulzim Hamitaj u shpreh në fillim të seancës dëgjimore se komisioni kishte vendosur përfundimin e rivlerësimit të prokurores Nushi për të tri kriteret, atë të deklarimit të pasurisë, pastërtisë së figurës dhe profesionalizimin.
Prokurorja Nushi nuk kishte kryer deklarim të saktë, por kishte burime të ligjshme për pasurinë e saj. Komisioni i Pavarur i Kualifikimit kreu edhe një hetim të pavarur mbi kriterin e pasurisë.
Ka pasur një mospërputhje me pronësinë e një toke në Mifol të Vlorës, por edhe për një apartament në Kashar të Tiranës në vlerën e 32 800 eurove.
Në vitin 2017, Nushi kishte deklaruar pjesë takuese edhe mbi një sipërfaqe prej 250 m2 truall, e cila nuk rezultonte në deklaratat e mëparshme.
Lidhur me apartamentin, subjekti ka deklaruar si burim një kredi bankare në vlerën e 25 mijë eurove, 4 mijë euro dhuratë nga familjarët si dhe kursimet. Hamitaj theksoi se në vitin 2008 nuk është deklaruar burimi i krijimit të apartamentit në Kashar dhe as dhuratat në vlerën 4000 euro.
Të ardhurat nga biznesi i bashkëshortit të saj, të deklaruar në vitin 2008 janë bërë gjithashtu objekt i hetimit. Është konstatuar se se vlera e të ardhurave ka qenë më e madhe nga ato të deklaruara, konkretisht në shumën 1.8 milionë lekë. Lidhur me një makinë të dhuruar ngë vëllai i sbujektit, ka rezultuar se nuk është pasqyruar asnjë deklarim i shtimit apo pakësimit të pasurisë. Sipas relatorit Hamitaj, konstatohet mangësi në deklarimet e pasurisë të kryera prej prokurores Alketa Nushi.
Pavarësisht pasaktësive dhe mospërputhjeve, Komisioni i Pavarur i Kualifikimit konstatoi se Nushi kishte burime të ligjshme për shpenzimet e kryera.
Prokurorja Alketa Nushi deklaroi para Komisionit se mospërputhjet lidhur me sipërfaqet e tokës nuk kanë ardhur për shkak të saj.
“Kam qenë e mitur kur janë fituar këto prona dhe nuk kam pasur tagër pronësie mbi to. Ndryshimet nuk kanë ardhur si pasojë e veprimeve të mia po për shkak të azhornimit. Ndërsa trualli nuk ekzistonte dhe figuron që prej regjistrimit të banesave të fshatit,” shpjegoi ajo, duke shtuar se kishte dhënë shpjegime të hollësishme për çdo pronë.
