Ditën e djeshme u shkarkua nga detyra kryeprokurorja e Tiranës Elisabeta Imeraj.
Ndërkohë që një ditë më pas KLP ka zgjedhur Arenc Çelën, si drejtuesin e përkohshëm për të zëvendësuar postin e saj.
Kujtojmë që Komisioni i Posaçëm i Apelimit vendosi unanimisht për shkarkimin e kryeprokurores Elisabeta Imeraj nga detyra me pretendimin se nuk justifikonte pasurinë dhe kishte shkelje të karakterit profesional. Drejtuesja e trupës gjykuese, Ina Rama tha se Imeraj nuk justifikon pasurinë, duke shtuar se subjekti ka mohuar faktet për ish- kunatin, duke treguar jo korrektësi. Ndërsa jashtë për mediat, vetë Imeraj tha se kurrë në jetën e saj nuk ka pasur as në pronësi dhe as në bashkëpronësi pasuri.
Ndërkohë që shtoi se shkarkimi i saj nga detyra ka ardhur me urdhër të dikujt, por nuk ka përmendur asnjë emër dhe nuk ka lënë që të kuptohet asgjë. Përveç faktit se premtoi që me të siguruar prova dhe fakte do t’i bënte publike. Por gjthashtu nuk harroi që të shtonte se vendimin do ta ankimonte në Gjykatën e Strasburgut, pasi sipas saj, Vettingu nga proces që supozohet që të reformonte sistemin e drejtësisë, në fakt është kthyer në gjueti shtrigash.
Theksojmë se procesi ndaj saj nisi një javë më parë në Kolegjin e Posaçëm të Apelimit ku u zhvillua seanca që palët dhanë konkluzionet përfundimtare, e vetë kryeprokurorja e Tiranës kërkoi që të mos përjashtohej nga sistemi i drejtësisë, duke shtuar se duhet që të lihet në fuqi vendimi i KPK që e konfirmoi në detyrë, ndërsa nga ana tjetër Komisioneri Publik, Florian Ballhysa, në raportin e tij kërkoi shkarkimin e saj me argumentin se nuk plotëson asnjë nga tre kriteret e Vetting; pasurinë, integritetin e figurës dhe atë profesional.
