Dy drejtuesit e burgut të sigurisë së lartë në Drenovë janë përjashtuar nga detyra pas një hetimi të brendshëm që zbuloi shkelje serioze të rregullave dhe dyshime për bashkëpunim me grupin kriminal të Laert Haxhiut.
Në vend të tyre, në krye të institucionit është rikthyer Lorent Nako, i cili më parë ishte shkarkuar në shkurt të vitit 2024 për t’ia lënë vendin Fatjon Fashos. Ky i fundit tani po hetohet nga autoritetet dhe është larguar nga pozicioni.
Po ashtu, shefi i policisë së burgut, Sokol Kaçoli, është zëvendësuar me Artan Koçibellin, ndërsa Kaçoli ndodhet nën hetim për lidhje të dyshimta me të dënuarit.
Raporti i Drejtorisë së Përgjithshme të Burgjeve evidenton se Laert Haxhiu dhe dy bashkëpunëtorët e tij, Orgest Bilbili dhe Anterio Kaloshi, qëndronin në dhoma ngjitur në të njëjtin sektor, një shkelje e rëndë e protokolleve të sigurisë së lartë.
Gjatë një kontrolli të kryer në qelitë e tyre janë sekuestruar katër telefona celularë (model iPhone dhe Samsung), si dhe pajisje të tjera elektronike si karikues dhe kufje me bluetooth.
Ekzistojnë dyshime se në ambientet e burgut futeshin edhe femra për shërbime personale për Haxhiun, duke shkelur edhe më tej rregullat.
Laert Haxhiu, i dënuar me burgim të përjetshëm për masakrën në Lushnjë në 2017, po përballet aktualisht me akuza të reja bazuar në dëshmitë e bashkëpunëtorit të drejtësisë, Artan (Marjus) Tafanit.
Sipas këtyre dëshmive, Haxhiu është përfshirë në një varg vrasjesh të rënda në Shqipëri dhe Greqi, mes të cilave ato të Lulzim Qorrit (Athinë, 2018), Fridmand Xhaferraj (Korçë, 2021), Çajup Selimit (Tepelenë, 2021), Dikens Halilit (Athinë, 2021), Alban Semakut (Peqin, 2021) dhe Albi Bashaliut (Elbasan, 2021). Ai po akuzohet edhe për organizimin e atentateve me tritol, tentativa vrasjeje dhe gjobvënie.
Hetimet ndaj funksionarëve të shkarkuar janë në vazhdim, ndërsa autoritetet po intensifikojnë kontrollet për të luftuar korrupsionin dhe lidhjet e paligjshme brenda sistemit penitenciar.
