Agjencia e Mbikëqyerjes Policore ka pezulluar nga detyra këtë të hënë Nënkomisaren e Komisariatit nr.1 në Tiranë, Besie Koshena pasi akuzohet për mashtrim. Ndërkohë një 35-vjeçar i identifikuar si Gani Kurti është lënë në masën e sigurisë “Arrest shtëpie”. Sipas AMP-së, efektivja, në bashkëpunim me 35-vjeçarin duke shfrytëzuar atributet e Oficerit të Policisë Gjyqësore, pas ekzekutimit të urdhrit për kthimin e mjetit të sekuestruar, nëpërmjet mashtrimit ka përvetësuar atë mjet dhe në bashkëpunim 35-vjeçarin e kanë shitur atë për pjesë këmbimi me qëllim përfitimi.
NJOFTIMI I AMP:
Tiranë/ Vijon procesi i vetëpastrimit të Policisë së Shtetit. Pas një hetimi të thelluar nën drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Tiranë, Agjencia e Mbikëqyrjes Policore ka ekzekutuar masat e sigurimit personal për një oficere policie dhe një shtetas, të dyshuar për kryerjen e veprës penale “Mashtrim”.
Masa e sigurimit “Pezullim nga detyra si punonjëse e Policisë së Shtetit” dhe “Detyrim për paraqitje në Policinë Gjyqësore”, për punonjësen, N/Komisare B.K., 44 vjeçe, efektive në Komisariatin e Policisë Nr.1, Tiranë. Masa e sigurimit “Arrest në shtëpi” për shtetasin G. K., 35 vjeç.
Nga hetimet e kryera u siguruan prova se punonjësja e policisë B.K., gjatë kohës që ka kryer detyrën si Specialiste për Hetimin e Krimeve, duke shfrytëzuar atributet e Oficerit të Policisë Gjyqësore, pas ekzekutimit të urdhrit për kthimin e mjetit të sekuestruar, nëpërmjet mashtrimit ka përvetësuar atë mjet dhe në bashkëpunim me shtetasin G.K., e kanë shitur atë për pjesë këmbimi me qëllim përfitimi.
